Sa pagpanalipod sa kahimsog, kaluwasan, seguridad, ug kaharuhay sa mga pasahero nga mobiyahe atol sa pag-obserbar sa Semana Santa ug summer vacation, ang Cebu Port Authority (CPA) mipabalik sa ilang programa nga Oplan Byaheng Ayos.
Sumala sa pamahayag sa CPA sa Miyerkules, Marso 29, 2023, kini ang ilang tubag sa kamandoan ni Department of Transportation (DOTr) Secretary Jaime Bautista bahin sa pagseguro sa kaluwasan sa mga mobiyahe nga hinungdan nga ipatuman sa mga pantalan sa Sugbo ang high alert sugod sa Abril 2 hangtod sa Abril 10, 2023.
Sayo niining semanaha, ang Port Security, Safety and Environmental Management Department (PSSEMD) sa CPA nitapos na sa tanang pagpangandam sa pagdagsang sa mga pasahero sa koordinasyon sa Philippine Coast Guard, Philippine Navy, Philippine Drug Enforcement Agency, Bureau of Customs , Maritime Industry Authority, Bureau of Fire Protection, Waterfront Police Station, Mabolo Police Station ug Regional Maritime Unit.
Sa miaging tuig, ang CPA nakatala og total nga 345,445 ka mga pasahero atol sa Semana Santa.
Apan, karong tuiga, tungod kay sa “zero Covid” nga mga limitasyon ug sa taas nga bakasyon, gipaabot nga ang gidaghanon sa mga mamiyahe modoble. (KJF)