LTO 7 mopatuman sa ‘Oplan Biyaheng Ayos!’

LTO 7 mopatuman sa ‘Oplan Biyaheng Ayos!’

Subay sa direktiba ug guidelines nga gilatid ni Land Transportation Office (LTO) Chief Assistant Secretary Atty. Jose Arturo Tugade, ang LTO 7 nangandam alang sa kaluwasan sa mga sumasakay ug mga motorista tungod sa taas nga bakasyon nunot sa pag-obserbar sa Semana Santa.

Sa ilang pamahayag sa media, si LTO 7 Regional Director Victor Emmanuel Caindec nibutyag nga ang “Oplan Biyaheng Ayos!: Semana Santa and Summer Vacation 2023” ipatuman sugod sa Biyernes, Marso 31, hangtod sa Abril 10 o pagkasunod adlaw sa Easter Sunday.

“As early as the first week of March, nakadawat mi og direktiba gikan ni Asec. Tugade nga itakda ang among implementing plan sa dili pa ang aktuwal nga paglusad sa oplan. Ang among mga personnel magpabiling nagtrabaho bisan sa weekends ug holidays,” matod ni Director Caindec.

Dugang pa niya nga ang mga personahe sa rehiyon mokuha og duha ka shifts kada adlaw alang sa 11 ka mga adlaw nga yugto sa Oplan aron mamintinar ang kaluwasan sa kadalanan ug masiguro ang kaluwasan sa mga motorista ug mga pasahero pinaagi sa random roadside ug terminal inspections.

“Since this is one of the longest holidays of the year, we want to make sure that our passengers are safe during their travels, right from the terminals our personnel will check if the public transportation vehicles are fit for the roads,” pasabot ni Caindec nga sama sa miaging tuig, walay PUVs nga maka-accommodate og mga pasahero kon maisip nga dili kini angay o luwas sa pagbiyahe.

Lakip sa mga terminal nga bantayan sa LTO 7 mao ang Cebu North Bus Terminal, Cebu South Bus Terminal, Kamagayan PUV Terminal, SM City Cebu PUV Terminal, Tagbilaran City Bus Terminal, Jagna Bus Terminal, Dumaguete City Bus Terminal, Siquijor PUV Terminals.

Ang LTO 7 Malasakit Help Desk ibutang usab sa matag usa sa mga nag-unang terminal aron pagtabang sa mga motorista ug mga pasahero.

“Akong gimandoan ang atong Operations Division Chief nga si Aden Belza nga ipakatap ang atong District Law Enforcement Teams aron motabang sa mga reklamo sama sa pagdumili sa paghatag og serbisyo, trip-cutting, overcharging sa plete, ‘contracting’, colorum, ug uban pang mga kalapasan,” matod ni Caindec .

Ang mga patrol team sa Law Enforcement Officers sa LTO 7 maoy responsable sa pag-inspeksyon sa daplin sa dalan ug mga kalihokan sa pagpatuman sa balaod sa mga dagkong dalan sa rehiyon.

Ingon usab, ang Central Command Center hotline sa LTO 134-2568 kay 24/7 nga magamit aron makontak sa publiko kon adunay mga reklamo o isyu gikan sa mga motorista ug mga pasahero.

“We are very particular with the implementation of RA 4136 or the Land Transportation and Traffic Code especially those violators committing reckless driving, driving colorum vehicles, those with defective parts and accessories and among others,” dugang sa direktor. (PR, RRM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph