Gipatawag ni Cebu Governor Gwendolyn Garcia ang laing hut-ong sa mga nanag-iya og real property sa Osmeña Boulevard sa dakbayan sa Sugbo kansang mga istruktura giingong nilapas sa road lot nga gipanag-iya sa Cebu Provincial Government.
Ang Real Estate Division sa Kapitolyo niila sa labing menos 22 ka mga edepisyo nga nilapas sa gigahin nga linya sa property ilawom sa Civil Code of 1949.
Ang CPG maoy tag-iya sa mga luna sa Osmeña Boulevard apil ang sidewalk gikan sa building sa Kapitolyo paingon sa Fuente Osmeña Circle.
Lakip sa mga inilang edepisyo nga anaa nagbarog sa Osmeña Boulevard mao ang Cebu Doctor’s Hospital and University, Cebu Gospel Church, Suarez & Sons, Avon, Coco Mall, Anitas bakeshop ug daghan pang uban.
Si Garcia nipasabot atol sa ilang tigom niadtong Marso 28 nga isip legal nga tag-iya sa maong mga property, ang Kapitolyo adunay katungod nga mangayo sa makiangayon nga bayad base sa Consumer Price Index (CPI) sugod sa dapit nga nalapas diin ang mga istruktura gitukod.
Kini ang iyang tubag human usa sa mga property owner nihangyo sa gobernador nga kaluy-an sila sanglit ang isyu sa encroachment nitumaw kapin 50 ka tuig na ang nakalabay human natukod ang ilang edepisyo.
Gipasabot ni Garcia nga ang mga Sugbuanon maoy nanag-iya sa maong mga kabtangan ug siya usa lang ka tigbantay.
Matod ni Garcia nga kon magpabaya lang siya sa iyang katungdanan, mahimo siyang mapasakaan og kaso nga dereliction of duty.
Ang gobernador nihatag og igo nga panahon ngadto sa mga structure owner aron ilang masusi pag-usab ang validity sa pangangkon sa Kapitolyo.
Sa samang higayon, ila usab mahukman kon mobayad ba sila o dili sa abang sa property nga ilang nagamit o ilang pilion nga ipaguba ang ilang istruktura nga nilapas ngadto sa propiyedad sa Kapitolyo.
Una niini, ang Metro Cebu Water District ug Philippine Long Distance Telephone maoy unang gipatawag ni Garcia aron sila paabangon sa yuta nga ilang giokupar sa sidewalk sa Osmeña Boulevard.