Hingpit nang gi-file ni Cebu Governor Gwendolyn Garcia ang kasong kalapasan sa Republic Act No. 3019 ug sa Republic Act No. 7160 batok sa lima ka mga opisyal sa Bureau of Animal Industry (BAI) sa Office of the Ombudman Visayas, sa Marso 29, 2023.
Si Atty. Isis Jane Capampangan sa Office of the Provincial Attorney maoy niduso sa maong kaso aron patubagon ang mga BAI officers sa ilang gihimo nga polisiya batok sa African swine fever diin ang mga baboy nga way sakit gipatay sa tuyo nga dili na makakatap ang virus.
Lakip sa gipasakaan og kaso ni Garcia, kinsa nagsilbing complainant, mao silang Dr. Paul C. Limson, Dr. Samuel Joseph M. Castro, Dr. Joshua Cruz, Dr. Miriam Lopez-Vito ug Dr. Daniel Ventura Jr.
Sa gipasakaan og kaso ni Garcia, tulo niini mga opisyal sa BAI sa Manila. Kini gilangkuban nilang Limson, director sa BAI; Dr. Castro, kinsa maoy deputy program coordinator; ug Dr. Cruz, kinsa maoy BAI-Coordinator on ASF. Samtang si Dr. Vito maoy regional veterinary quarantine station head; ug si Dr. Ventura maoy Region-7 coordinator on ASF.
Sa affidavit ni Garcia, iyang giasoy nga sa makadaghang mga higayon sa buwan sa Marso, ang BAI niisyu og public statement nga ang ASF nakasulod na sa Province of Cebu ug gilusad ang depopulation sa baboy pinaagi sa culling sulod sa 500-meter radius sa apektadong mga lugar, partikular sa Brgy. Can-asujan sa Carcar City aron malikayan ang pagkatap sa virus.
Giakusahan ni Garcia ang BAI nga wala mohimo og differential diagnosis aron masuta kon ASF ba ang niigo o laing sakit sa baboy ug ang samples nga nakuha gikan ra sa usa ka slaughter house sa dakbayan, di gikan sa usa sa mga piggery sa siyudad.
Gumikan niini, si Garcia niisyu og duha ka memorandum, nga nagdili sa culling sulod sa 500-meter radius ug pagpahimangno sa national agencies labi na sa Department of Agriculture nga mohimo og koordinasyon aron masiguro ang partisipasyon sa local government unit (LGU) sa plano ug implementasyon sa ilang mga programa ug proyekto.
Apan bisan pa sa kamanduan ni Garcia, iyang gialegahan nga ang BAI personnel nagpadayon sa ilang culling ug zoning map policy diin ang hog raisers maoy grabeng naapektohan.
Gipadayag usab ni Garcia subay sa pamahayag ni Rolando Tambago, presidente sa Central Visayas Pork Producers Cooperative niadtong Marso 24, nga moabot ngadto sa 2.5 milyunes ang baboy nga napatay dili sa infection sa virus, kon dili sa ilang polisiya nga gipatuman labi na sa culling.
“ BAI also insists that there is an ASF outbreak in the province of Cebu and the culling policy is the most effective way of to contain the virus. This side sweeping statement of the BAI has an immediate impact of the livelihood of the Cebuanos,” tipik sa affidavit ni Garcia.
Gipasanginlan sa gobernador ang mga akusado nga nagpakita sa ilang “partiality, evident bad faith or gross inexcusable negligence, accused cause undue injury to the party including the government, or giving any private party unwarranted benefits, advantage or preference in the discharge of his functions ug respondents should be held administratively liable.
“In the end, it is not the African swine fever that kills but the incompetence and inefficiency of public servants as demonstrated in respondents’ acts,” dugang ni Garcia.