Patay diha-diha ang 50 anyos nga lalaki human pusila samtang nag-istambay sa iyang paboritong dapit uban ang usa ka higala niini ug anak sa kapuyo sa Purok 3, Sityo Lupa, Barangay Kamputhaw, siyudad sa Sugbo, alas 10:30 sa gabii sa Martes, Marso 28, 2023.

Si Police Major Nolan Tagsip, hepe sa Abellana Police Station, niila sa biktima nga si Edgar Ensia Mongaya, lumolupyo sa dapit.

Naandan sa biktima matag gabii nga mag-istambayan sa eskineta nga dalan. Samtang nakig-istorya si Mongaya sa iyang higala, usa ka lalaki nga nagsul-ob og hoodie jacket nga itom ug way daghang estorya, nipusil sa biktima sa unom ka mga higayon.

Si Mongaya nahagba ug nakaangkon og daghang mga samad pinusilan nga niresulta sa iyang hinanaling kamatayon. Ang wa pa mailhi nga mamumuno wala masayri kon diin paingon human sa pagpusil.

Matod ni Tagsip, ang kapuyo sa biktima niingon nga si Mongaya kanhi drayber sa taxi ug nasikop sa kasong kalapasan sa Comprehensive Dangerous Drugs Act of 2002 niadtong Mayo 2022.

Ni-avail si Mongaya sa plea bargaining mao nga wala magdugay, nakagawas sa prisohan.