SAMA sa naandan nga kabahin sa relihiyusong pagtuo sa mga Pilipino panahon sa Semana Santa, dunay ubay-ubay nga manguli sa tagsa-tagsa ka mga probinsya.
Kini labi na kay taas ang mga adlaw nga walay eskuwela ug trabaho, maong makahigayon ang kadaghanan sa pagbakasyon aron didto mamalandong sa panahon sa mga balaang adlaw.
Tungod niini, istrikto ug hugot karon ang pagpatuman sa seguridad sa mga terminal sa bus, airport ug mga pantalan sa Davao City aron maseguro ang kaluwasan sa publiko.
Sa Davao City Overland Transport Terminal (DCOTT) atol sa pagsaulog sa Semana Santa ug bisan sa normal nga mga adlaw, hugot gayod ang pagpatuman sa seguridad.
Pagsulod sa terminal, usa-usa nga ipaagi sa baggage x-ray machine ang mga dala sa pasahero una kini makasakay og bus.
Sumala ni DCOTT manager Aisa Usop nga gilauman na nga modagsa ang daghang tawo sunod semana hinungdang nakig-alayon na sila sa Davao City Police Office (DCPO) ug Task Force Davao (TFD) alang sa pagpatuman sa kahapsay ug kalinaw.
Giingon sab sa opisyal nga daan na nilang gipahibalo ang mga bus operators nga magdugang og mga yunit kung kulangon kini subay sa panginahanglan sa ihap sa pasahero.
Istrikto usab nga gidili ang pagpasakay og mga pasahero gawas sa terminal aron malikayan ang posibleng dautang hitabo. Hinuon, gikanayon ni Davao City Public Safety and Security Office (PSSO) head Retired Colonel Angel Sumagaysay nga walay na-monitor nga direktang hulga sa terorista ang Davao City apan dili gihapon mo-kompiyansa.
Ang hataas nga pahulay sa bulan sa Abril nahisubay kini sa Proclamation No. 90, s. 2022, diin ang MalacaƱang nagdeklara nga ang Abril 6, 7, ug 10 usa kini ka regular holiday ug ang Abril 8 usa ka special non-working holiday nunot sa paghinumdom sa Semana Santa.