Dunay gipanid-an ang kapulisan sa dakbayan sa Sugbo bahin sa mga tawo nga ningtulis sa usa ka babaye nga nigawas lang sa balay sa iyang binuhing iro sa Barangay Kasambagan niadtong Martes sa kaadlawon, Marso 28, 2023.
Sa usa ka social media post sa giingong higala sa biktima (ngan gipugngan alang sa seguridad), kini niasoy sa kasinatian. Samtang gigawas sa dalaga ang iro aron makapagawas sa hugaw, kalit nga niduol ang usa ka drayber sa habalhabal ug nangutana kon mosakay ba siya sa motorsiklo apan iyang gibalibaran.
Pipila ka segundo, niabot ang riding in tandem nga armado og ice pick ug dayong deklarar og tulis ug gikuha ang iyang cellular phone.
Daling nanibat ang mga tulisan human nakuha ang iyang butang.
“Nowhere is safe anymore. Around Kasambagan, its always the same pattern. A habal-habal rider would approach you, and ask if you need a ride. After your refuse, another rider with a passenger would rob you (their weapon of choice is an ice pick), And the same rider who asked you if you needed a ride earlier pretend to chase the culprit. And both motorcycle would just vanish into thin air,” tipik sa post sa iyang higala human nasayod sa hitabo.Nagpa-blotter ang biktima sa Mabolo Police Station human sa insidente ug gihimoan na dayon nila og imbestigasyon aron pag-ila sa mga tulisan.
Si Police Colonel Ireneo Dalogdog, hepe sa Cebu City Police Office (CCPO), nagkanayon nga base sa pagsusi nila sa CCTV footage nga nakuha sa dapit, nailhan na nila kinsa ang maong mga tulisan.
Wala lang una gibutyag ni Dalogdog kon kinsa apan matod niya nga duna na kini kaso sa pagpangawat sa miaging buwan sa usa sa mga barangay nga ubos sa hurisdiksyon sa Mabolo PNP.
“Tagaan lang ta mo sa background aning suspect. Nadakpan ni siya last month kay nangawat ni siyag sapatos ug ubang mga gamit sa panimalay. Kay nakapiyansa lang ni siya tungod sa ka gamay sa piyansa sa offense nga iyang nahimo,” matod ni Dalogdog.