Ang Provincial Board (PB) sa Sugbo niaprobar sa P163.18 milyunes alang sa security service aron masiguro nga luwas ang ilang mga kabtangan ug edepisyo sa tibuok lalawigan sa Sugbo sa mosunod nga duha ka mga tuig.
Si PB Member Raul Bacaltos sa 1st District sa lalawigan sa Sugbo, nipasar og duha ka resolutions sa paghatag og gahom ni Gobernador Gwendolyn Garcia sa pagsulod og kontrata uban sa Cafe Security Agency Inc. ug Tactical Security Agency Inc. atol sa ilang regular session niadtong Marso 27, 2023.
Ang Cafe Security Agency Inc. nga maoy mobantay sa 21 ka mga property sa south nga bahin sa lalawigan sa Sugbo maoy nakakuha og P77.253 milyunes nga kontrata sulod sa 24 ka mga buwan.
Ang Tactical Security Agency Inc. maoy nakakuha sa kontrata alang sa amihanan balor og P85.928 milyunes aron maoy mobantay sa 25 ka property sa Kapitolyo nga molanat gihapon og duha ka tuig.
Ang 46 ka sites nga gipanag-iya sa Cebu Provincial Government naglangkob sa Capitol building, Legislative building, Cebu North Bus Terminal, Cebu South Bus Terminal, district hospitals, Cebu Provincial Detention and Rehabilitation Center (CPDRC) ug ubang mga property sa Kapitolyo.
“After a careful review and perusal of the relevant documents forwarded to this August body by the Bids and Awards Committee, through the Office of the Secretary to the Sangguniang Panlalawigan, on March 17, 2023, the same are found to be in order, ” mabasa ang tipik sa resolution ni Bacaltos.
Ang Bids and Awards Committee (BAC), pinaagi sa ilang resolution number 020 series of 2023, nideklarar sa Tactical Security Agency Inc. ug ang resolution number 021 series of 2023 nagdeklarar sa Cafe Security Agency nga maoy nidaug sa bidding ug ni-award sa maong kontrata ngadto sa duha ka agencies.