WAY girekomenda nga piyansa ang hukmanan sa pagsikop kang Brigadier General John Guyguyon, Regional Director sa Police Regional Office (PRO) sa Bangsamoro Autonomous Region in Muslim Mindanao (BARMM) alas 9 sa gabii niadtong Miyerkules, Marso 29, 2023.
Gisikop si Guyguyon base sa warrant of arrest sulod mismo sa iyang buhatan sa Camp Gen Salipada K. Pendatun, Parang, Maguindanao sa mga sakop mismo sa Criminal Investigation and Detection Group (CIDG-BARMM).
Si Guyguyon giingong nag-atubang og duha ka kasong syndicated estafa base sa warrant of arrest nga giisyu ni Judge Catherine Manodon sa Regional Trial Court, Branch 104, sa Quezon City pinetsahan og Disyembre 1, 2022, ug Judge Kathleen Dela Cruz-Espinosa sa RTC, Branch 91, sa Quezon City nga pinetsahan og Mayo 20, 2022 .
Tungod niini, gitudlo si Brigadier General Gil Francis Tria nga maoy mohulip sa posisyon ni Guyguyon.
Sukad sa pagsuwat ning balita, wala pay gipagawas nga pahayag ang kampo ni Guyguyon kalabutan sa pagsikop kaniya.