Andam mohatag ang unom ka mga reclamation developer sa 10 porsyento nga bahin sa Cebu Provincial Government sa ilang reclamation projects nga naa sa nagkadaiyang mga dapit sa lalawigan agi og pagtuman sa ordinansa sa Kapitolyo.
Kini ang nasabutan atol sa tigom nga gipatawag ni Cebu Governor Gwendolyn Garcia, chairman sa Cebu Provincial Reclamation Authority (CPRA), uban sa mga representante sa mga kompaniya nga adunay kasamtangang reclamation projects sa mga lugar sa lalawigan sa Sugbo niadtong Huwebes, Marso 30, 2023.
Lakip sa mga reclamation developer nga nitambong mao ang Cebu South Harbor Container Terminal Corporation, Cebu South Harbor, Cebu Industrial Park Developers, ug Dynacast.
Sa Biyernes, Marso 31, nakigtagbo usab kang Garcia ang Global Business Power Corp. ug Therma Visayas Inc. sa samang katuyoan.
Sa hinapos sa Abril, posibleng mopirma na og kasabutan ang Kapitolyo ug developers aron ilang masunod ang mga rekisitos nga nalatid sa reclamation ordinance sa Provincial Government.
Ilawom sa Provincial Ordinance No. 2009-02, ang si bisan kinsang reclamation developer kinahanglang motugyan sa 10 porsiyento sa ilang gi-reclaim nga dapit ngadto sa Provincial Government.
Niini, modaghan ang mga luna sa Lalawigan.
Laing option sa developers mao ang pagbayad ngadto sa Kapitolyo sa balor sa luna nga iyaha unta sa Kapitolyo.
Ang CPRA maoy gitahasan sa Kapitolyo nga mag-regulate sa mga reclamation project sa lalawigan sa Sugbo.
Ang Cebu South Harbor gikatakdang mohimo og reclamation project sa Talisay City samtang ang Cebu South Port ni-reclaim sa yuta sa Minglanilla.
Ang reclamation sa Cebu Industrial Park Developers nahimutang sa lungsod sa Balamban ug ang reclamation sa Dynacast Shipbuilding and Repairs nahimutang sa Danao City.