Ang Land Transportation Office (LTO 7) nakadakop og 4,757 ka mga drayber sa mga sakyanan sa nagkadaiyang mga kalapasan sa mga lagda sa trapiko gikan sa Enero hangtod sa Marso, 2023.
Si Aden Belza, pangulo sa Operations Division sa LTO 7, nagkanayon nga sa maong gidaghanon, 1,110 sa mga driver gidakop kay wala nag-seat belt samtang nagmaneho.
Ikaduha, ang sakyanan nga adunay depekto nga parts ug accessories, 883 ang ilang nasikop.
Ikatulo mao ang professional reckless driving diin 375 ka drivers ang ilang naisyuhan og Temporary Operator’s Permit (TOP).
Ikaupat mao ang kapakyas sa mga nagmaneho sa sakyanan o motorsiklo sa pagdala sa ilang Official Receipt (OR) ug Certificate of Registration (CR) nga adunay 216 ka mga driver ang nadakpan.
Ang LTO 7 nakadakop usab og 126 ka mga driver nga nagmaneho og unregistered motor vehicles sa miaging tulo ka mga buwan.
Aduna say 13 ka mga muffler nga gi-surrender ug adunay duha nga pending muffler violations.
Sa miaging tulo ka mga buwan, ang LTO 7 naka-impound og 259 ka mga sakyanan ug motorsiklo apan ang 191 niini, nakuha na og balik sa mga tag-iya.
Si Regional Director Victor Caindec niawhag sa mga motorista sa pagsunod sa mga lagda sa trapiko aron makalikay sila nga madakpan sa ingon dili sila maisyuhan og TOP.