Bana nga gituohang hubog nitulis sa iyang asawa nga nagbantay sa usa ka burger outlet alas 8:45 sa gabii sa Miyerkulis, Marso 29, 2023 sa Villagonzalo 1, Brgy. Tejero, dakbayan sa Sugbo.
Ang biktima giila nga si Angelie Grapa, 44, minyo, crew sa Angel’s Burger samtang ang suspek ang iyang bana nga si Alexander Timtim Grapa, Jr., 42, taga Sitio Mansanitas, Brgy. Cogon-Pardo, dakbayan sa Sugbo.
Si Alexander nasikop sa follow up sa kapulisan alas 2:05 sa hapon Huwebes, Marso 30, sa Brgy. Inayawan, dakbayan sa Sugbo.
Si Police Chief Master Sgt. Winston Ybañez, imbestigador sa Waterfront Police Station nga nahinabi sa dySS Super Radyo Cebu, nagkanayon nga ang outlet supervisor nga si Shiela Carrido, taga Talisay City ug si Angelie maoy ning-report sa Waterfront Police Station sa Huwebes sa alas 10:15 sa buntag.
Ang biktima mibutyag sa kapulisan nga samtang na-busy siya sa pagbantay sa mga baligya, niabot ang iyang bana, nangayo og kwarta.
Iyang gihatagan si Alexander og P300 apan nasuko kay padugangan og P500.
Iyan gipasabot ang iyang bana nga wala siyay kwarta, P300 ra kay ang sobra alang sa ilang anak nga nag-eskwela.
Tungod niini, ang suspek giingong nibunot sa dala nga screw driver, nition sa biktima ug niingon nga “Unsa man, gusto ka?” dala sa hudlat nga pagdunggab.
Ang biktima nilugnot unta apan matod niya gisumbag ang iyang bukton busa wa na siya nakapalag.
Nakuha ang halin nga P1,200 dayong sibat sa iyang bana.
Sa imbestigasyon sa kapulisan, si Alexander nidepensa nga nagsabot sila sa iyang asawa nga hatagan siya og kwarta.
Apan nasuko siya kay kulang ang gihatag nga pangtulak sa iyang giinom.
Ang asawa nitug-an sa kapulisan nga ang iyang bana nagumon sa ilegal nga drugas.
Kasong pagpanulis ang gipasaka sa kapulisan batok sa suspek nga gitanggong sa Waterfront Police Station. (GPL)