Pwerteng tiyabaw sa usa ka Indian national dihang gisikop siya sa mga pulis sulod sa usa ka kwarto sa motel sa Mandaue City atol sa entrapment niadtong Huwebes sa alas 6 sa gabii, Marso 30, 2023.
Gilusad nila ni Police Major Romeo Caacoy Jr., hepe sa Station 2 sa Mandaue City Police Office (MCPO) ang entrapment human nireklamo ang usa ka 21 anyos nga dalaga batok sa iyang kanhi uyab nga langyaw.
Matod ni Caacoy nga pipila ka mga adlaw ang nakalabay, nireklamo sa ilang police station ang dalaga batok kang Suroj (di tinuod nga ngan), 29, lending company collector, nagpuyo sa dakbayan sa Lapu-Lapu kay nanghulga nga ipakatap ang ilang sex video.
Sila si Suroj ug ang dalaga manag-uyab apan nagkabuwag.
Si Caacoy niingon nga ang dalaga nisumbong kanila nga gihagad siya og pakighilawas sa langyaw ug kon di mosugot iyang ipakatap sa social media ang ilang sex video.
Sa kahadlok sa biktima, nidangop gilayon siya sa kapulisan.
Gitugyan ni Caacoy ang kaso ngadto sa ilang Women and Children Protection Desk (WCPD) section aron abagan ang dalaga.
Ang dalaga nibutyag nga sige og chat kaniya si Suroj aron siya hagdon og pakighilawas.
Gawas niini, si Suroj giingong nangayo usab og P3,000 matag video nga iyang mapapas. Ang Indian national giingong dunay upat ka sex videos nga gihuptan.
ENTRAPMENT
Ila dayon gipasakay sa paon si Suroj pinaagi sa pagsugot sa dalaga sa hangyo niini nga magkita sila sa motel ubos sa jurisdiction sa Subangdaku Police Station nga gipangulohan ni Caacoy.
Ang dalaga ug si Suroj diha na sulod sa kwarto dihang nisulod ang mga pulis sa pagdakop sa suspek.
Sa pakighinabi sa Superbalita Cebu, si Suroj nanghimakak sa pasangil sa dalaga batok kaniya.
Matod niya nga nakigkita siya sa biktima tungod kay duna kini sex video uban ang laing lalaki.
Apan si Caacoy niingon nga di na makapanghimakak ang langyaw tungod kay naa sa mga text message ug chat ang mga ebidensya.
Matod niya nga lusot na lang kini sa suspek.
Kasong grave coercion ipasaka batok kang Suroj.
Ang pagtuon sa dalaga nabalda tungod sa iyang tumang kahadlok sa langyaw, dugang ni Caacoy.
Editor: Gipugngan ang ngan sa suspek aron kapanalipdan ang identity sa biktima. Sa unang gawas ani nga estorya ginganlan ang suspek.