BISAN og wala gidili sa Simbahang Katoliko ang penitensiya, wala kini nag-awhag sa mga debotadong Katoliko sa pagpasakit sa ilang kaugalingon sama sa pagkulata sa lawas ug pagpalansang sa krus.
Kini ang pahinumdom ni Most Reverend Bishop Jose Colin Bagaforo, D.D sa Diocese of Kidapawan, kinsa mao usab ang presidente sa Caritas Philippines.
Matud sa obispo, ang tinuod nga mensahe sa Semana Santa mao ang paghinulsol sa sala, pagbag-o sa dili maayong pamatasan, ug gugmang putli.
Gidugang niya nga girespeto niini ang mga panaad sa mga deboto kon maglambigit kini sa kausaban sa kinabuhi, dili lang sa usa ka adlaw kon dili sa taas nga panahon.
Kung gusto nga sundon si Kristo, dili kini matapos sa pagpasakit sa lawas kon dili sa pagbag-o sa iyang kinabuhi ug pagbalik sa Ginoo.
Giklaro ni Bishop Bagaforo nga sa panahon sa Balaang mga Adlaw, kinahanglang aktibo ang mga magtutuo sa mga kalihukan sa simbahan aron ang tibuok Santa Iglesia makabaton og tinuod nga kausaban ug makabaton og lig-on ug matinud-anon nga pagtuo.
Dugang pa, ang Semana Santa wala gideklara nga pista opisyal (holiday) sa paggawas sa ubang dapit, pagsuroy-suroy ug paglingaw-lingaw. Matud niya nga panahon kini sa pag-ampo, pagpuasa, pagpamalandong ug aktibong pagsunod sa mga kalihukan sa Semana Santa ug pagbaton og lig-on ug matinud-anon nga pagtuo.
Ang Kwaresma sa Simbahang Katoliko mao ang 40 ka adlaw nga pagpangandam alang sa Dominggo sa Pagkabanhaw sa atong Ginoong Hesus nga magsugod sa matag "Ash Wednesday".