NAA na'y ginadebelop karon nga person of interest ang Bansalan Municipal Police Station labot sa pagpatay sa magtiayong senior citizen, apan dili pa mabutyag sa kapulisan ang inisyal nga kalamboan sa ilang gidudahan nga mga responsable.
Huwebes sa hapon, Marso 30, 2023, napalgan na lang sa usa ka alyas Blas ang patay nga lawas sa 66-anyos nga lalaki sud sa tindahan niini didto sa Purok Durian, Barangay Kinuskusan, Bansalan, Davao del Sur.
Giingon nga mopalit unta si alyas Blas sa tindahan apan wala mitubag ug iyang nasiplatan ang nagbuy-od nga patay'ng lawas ni Modesto Gumapac, 66-anyos, hinungdan nga mi-report kini sa mga opisyal sa barangay.
Di ra sab layo sa balay sa biktima, napalgan sab ang asawa nga si Evelinda Gumapac, 60-anyos, kinsa nagbuy-od nga wala nay kinabuhi taliwala sa gomahan.
Sumala sa kapulisan sa Bansalan Municipal Police Station nga dunay mga samad sa ulo ang biktima nga lalaki nga gituohang gibunalan og bato, samtang ang babaye daghan sab og samad ug nahubo na ang mga sapot niini sa pribadong parte sa lawas nga gidudahang gipanamastamasan una gipatay.
Mga gamit sa mga biktima sa ilang balay nangabungkag nga gituohang gipang-ukay sa mga suspetsado ug gipanguha ang kuwarta nga halin sa tindahan, hinundang tulis ang unang gitan-aw sa kapulisan nga motibo sa krimen.
Giingon sab sa kapulisan nga bag-o lang suma pa nahalinan og kopras ang mga nahisgutang biktima ug ang kuwarta niini gilimas sa mga suspetsado.
Saysay sa pipila ka mga silingan nga sa wa pa ang krimen, matag alas 10 ngadto alas 12 sa gabii magsige'g aw-aw ang mga iro sa mga biktima ug mga iro sa silingan.
Ning kasamtangan, patay'ng lawas sa magtiayon anaa na sa usa ka lokal nga punerarya sa dapit samtang pabiling gawasnon ang mga suspetsado apan padayong mihimo og follow operation ang awtoridad sa hitabo.