Anaa na karon sa peligrusong sitwasyon ang Dallas Mavericks nga gipangulohan sa ilang star player nga si Luka Doncic.
Kini gumikan kay nag-ungaw sila karon sa posibilidad nga dili makasulod sa playoffs.
Daghan ang nagtuo nga ang paghiabot ni Kyrie Irving sa teritoryo sa Dallas makatabang og dako sa Mavericks.
Pero nasukwahi ang sitwasyon kay gikan sa ikalimang puwesto nahagsa na man hinuon sila sa ika-11 nga luna sa West. Bisan gani sa play-in tournament, maglisod na man gani sila og hulbot og lingkuranan (7-10).
Kon ang team nga adunay star player nga susama og kalibre ni Doncic unya dili makasulod sa playoff, kini nagtangag og dakong tanghaga.
Ang Mavs nindot unta og dagan sa sayong bahin sa season pero sa kalit lang mikolapso human sa gihimong pag-trade sa ilang ubang mga players ngadto sa laing star player nga si Irving.
Sukad nila makuha ang serbisyo ni Irving, ang Dallas daw og sa nawad-an sa direksyon. Sa 22 nila ka duwa, walo ray nadag-an. Matataw usab sa record nga sa 13 ka engkuwentro diin dungan nga nakaduwa sila si Irving ug Doncic upat ra usab ang ilang daog.
Misamot og kadag-om ang ilang purohan alang sa sunod round kay ang sunod nilang ikasangka mao man ang mga playoff contenders sa East - ang Miami Heat ug Atlanta Hawks.
Di usab layo ang posibilidad nga masuspenso og usa ka duwa si Doncic kon madugangan pa og usa ang iyang technical foul.
Sa NBA, kon ang player makahimo og 16 ka technical fouls sa usa ka season, pahamtangan gilayon kini og one-game suspension. Si Doncic kinsa nag-average og 32.9 points matag duwa aduna nay 15 ka TF.
Sa kasaysayan sa NBA, lima lang ka mga players ang nag-average og 32 puntos o kapin matag duwa sa regular season nga wala makasulod sa playoffs.
Kini mao sila si Stephen Curry (32.0) sa Golden State Warriors 2020-21 season; Bernard King (32.9) Knicks 1984-85; Allen Iverson (33.0) Philadelphia 2005-2006; Tiny Archibald (34.0) Kings 1972-73; ug Wilt Chamberlain Warriors 1962-63.
Ug sa senaryo karon, hayan si Doncic mahitapo na niining grupoha. Mao ni dakong risgo sa trade. Bisan pa og unsa ka talento ang imong makuha pero og dili mohaom sa sistema o kaha dili makasagol sa chemistry, hagba gyud ang team.
Sa tinguha nga mabitik ang serbisyo ni Irving, ang Dallas mibaylo nila ni Spence Dinwiddie, Dorian Finney-Smith ug pipila ka draft picks ngadto sa Brooklyn Nets.
Unsay resulta? Nets no. 6 sa East samtang Mavs mitidlom sa ika-11 nga puwesto sa West.
Mapupos na ang kontrata ni Irving sa Dallas ning naghinapos nga season nga nagkantidad og $136 million sa upat ka tuig, dinhi maglabad na usab ang ulo sa Dallas kon hatagan ba kini nila og extension.
Pero sa simpli nga lohika, aron dili mausik ang kahigayonan, kinahanglan ilang i-renew ang kontrata ni Irving aron paghatag og igong panahon nga mohaom siya sa sistema apan kon dili gyud, tukma na lang sab nga i-trade ngadto sa laing team bugti og laing dekalidad nga mga players.
Kini maoy atong atngan kay ang Lakers ra ba morag nagpakita og interest ni Irving kaniadto, pero ambot og interesado pa ba gihapon sila niini ilabi na kay niayo na man ang ilang dagan ning naghinapos nga bahin sa regular season.