Semana Santa na. Mao ni ang mga adlaw nga tanan, kon lingawlingaw lang ang huna-hunaon, malingaw ka gyud kay taas ang mga adlaw nga way trabaho, gawas namo nga makaginhawa lang sa Huwebes ug Biyernes Santo.
Holiday pa sa Lunes, Abril 10. Kalami sa paminaw nga makabadhas sa kabukiran. Apan kami sa Black Saturday pa lang, balik na og trabaho.
Kay summer lagi, nindot ron isuroy sa mga beach. Kadtong di ganahan og dagat sama nako kay gidid-an na sa doktor, dunay dakong mga sapa nga nindot itampisaw, sama sa Lusaran ug Cambinocot.
Naa say maanindot nga naa sa portion sa Butuanon River sa ibabaw sa Brgy. Pulangbato.
Kining tanan puro ni naa sa Cebu City. I know nga naa sab sa Compostela ug Danao nga mga sapa nga maanindot kaligoan.
Accessible kaayo ni sa mga mountain biker. Sa akong mga sikad kauban ang akong mga higala, ako ning naagian but wa man silay hilig og kaligo atol sa sikad.
But mas nindot ni i-enjoy kon sayo kang mogikan kay at least di pa kaayo init sa agianan. Mas bentaha ka kon taga Talamban area kay puro ni maabot at least usa ngadto sa duha ka mga oras.
Ang mga beterano sa mountain biking nakahibawo ani. Ako lang sab ni nga suggestion ang pagkaligo.
IMPORTANTE
Sa mga edaran ug niadtong duna nay maintainance nga tambal, likayi lang ang pagpainit og maayo samtang nagsikad.
Mas maayo gani nga pasado alas 5 pa lang sa buntag, mogikan ka na. Kanang igong makita na ang karsada bisan way suga aron toa ka na sa kabukiran unyag subang sa adlaw.
Kini man gung naa ka nay maintenance, gikinahanglan kang mokonsulta og doktor. Naay mga doktor nga motambag nga mas maayo mag exercise apan di lang magpalabi.
Usa nako ka higala nisobra, giatake sa kasingkasing samtang nagsikad. Namatay intawon. Lain sab nga higala sa akong usa ka kauban sa biking namatay human giatake sa kasingkasing tungod sab sa kainit samtang nagsikad.
Mas maayo sab nga maminaw sa lawas. Di pugson kon dunay gipamati. Kay bisan gani kon magmotorsiklo ka, kuyaw gihapon sa atake sa kasingkasing. Bag-ohay lang duha ang nangamatay tungod niini.
Busa, mag-amping ta sa ting-init.