Iyaan giingong nihingan og kawatan sa pag-umangkon nalutsan og warrant of arrest sa kasong grave oral defamation, napriso human nadakpan alas 4:30 sa hapon sa Biyernes, Marso 31, 2023 sa Sitio North Guinabasan, Brgy. Tubigagmanok, lungsod sa Asturias, Sugbo.

Si Lelita Bornia, 57, minyo, nagpuyo sa nahisgutang dapit, makatu’g sa prisohan og mga tulo ka gabii.

Si Police Master Sgt. Ronald Duran, sa Asturias Police Station nga nahinabi sa Superbalita Cebu, nagkanayon nga sa Lunes, Abril 3, gikatakdang mopiyansa si Bornia og P18,000.

Si Judge Mary Jocelyn G. Regencia sa Municipal Circuit Trial Court (MCTC) Balamban-Asturias Cebu maoy niisyu sa warrant of arrest nga gipetsahan og Marso 27, 2023.

Si Bornia, nga nahinabi sa Superbalita Cebu, nipasangil nga gihimohimoan siya og estorya sa iyang pag-umangkon.

Gipasanginlan siya nga nanabi nga nadakpan ang iyang pag-umangkon sa Manila kay nangawat.

Tungod sa pagpadagan sa estorya nga pagpangawat, siya gipatawag sa barangay.

Wala sila magkasinabot kay siya nanghimakak sa pasangil sukad niadtong 2021.

Siya nipasangil nga nasuko kaniya ang iyang pag-umangkon ug nagkaaway sila dihang gipaningil sa utang.

Siya nipasangil nga nangutang ang iyang pag-umangkon gamit ang iyang ngan hinungdan nga sila nagkalalis. (GPL)