Samtang nagkahuyang ang hulga sa coronavirus disease (Covid-19), ang Archdiocese of Cebu nipaluag pa sa ilang health protocols sa mga simbahan.
Base sa Circular No. 6/23, si Cebu Archbishop Jose Palma niingon nga nakahukom sila nga tangtangon ang pipila sa ilang health protocols sa panahon sa pag-obserbar sa Semana Santa.
“Please take note of the following updates from said Commission in our liturgical protocols as we approach the latter weeks of our Lenten season,” matod ni Palma.
“We are now reverting to the proper celebrations of the liturgy according to the norms,” dugang niya.
Mahitungod sa Holy Communion, ang obispo miingon nga mahimo na kining ihatag sa dila, bisan pa nga ang paghatag niini sa kamot mao ang “pinakaluwas ug gipalabi nga paagi” sa pagdawat sa Balaang Komunyon.
Matod usab ni Palma nga ang pag-anunsyo sa text nga “The Body of Christ” sa pari, sa kinatibuk-an, optional na tungod kay giawhag karon ang mga lay minister nga isulti kini sa matag komunikante.
Gideklarar usab sa arsobispo nga optional na ang pagsul-ob og face mask sa mga simbahan.
Dugang niya nga ang mga pastor ug mga personahe sa simbahan padayon nga gidasig sa paghatag og mga sanitation materials, sama sa alkohol, sa kinadak-ang pultahan sa mga simbahan.
Kabahin sa mga kalihukan sa Semana Santa, si Palma niingon nga atol sa pagsimba sa krus sa liturhiya sa Biyernes Santo, gidasig gihapon ang mga matuohon sa paghimo sa gesture of genuflection atubangan sa krus, inay sa paghalok ug paghikap niini.
Si Palma niingon nga ang mga magtutuo sulod sa simbahan gitugotan nga mohikap sa mga imahen apan dili mohalok niini human sa debosyonal nga prosesyon sa kadalanan sa Biyernes Santo. (HDT sa SunStar Philippines)