Aron di makalugar ang mga kriminal, sugdan sa Cebu City Police Office (CCPO) ang pagpakatap og mga polis ang mga simbahang Katoliko karong Dominggo, Abril 2, 2023.
Kini tungod sa kadaghan sa mga tawo nga mobisita sa mga simbahan aron pabendisyonan sa pari ang ilang mga palwa.
Si CCPO Chief Colonel Ireneo Dalogdog niingon nga adunay 31 ka mga simbahang Katoliko sa dakbayan nga nagkinahanglan og seguridad atol sa Semana Santa.
Iyang gimanduan ang mga police station commander nga magbutang og police assistance desk gawas sa simbahan aron makaduol kanila ang mga mosimba kon makasugat sila og problema.
Usa sa iyang direktiba mao ang pagbitay og mga tarpaulin nga adunay safety tips unsaon paglikay sa mga kriminal.
Magbutang usab og dugang personnel si Dalogdog sa Police Station 6 sa Carbon ug Station 9 sa Barangay Guadalupe, diin ipahigayon ang Buhing Kalbaryo.
Ang Buhing Kalbaryo usa ka dula sa kadalanan nga naghulagway sa Pasyon ni Kristo.
Sa dihang gipangutana kon gikinahanglan ba sa CCPO ang augmentation forces, si Dalogdog nitubag nga wala tungod kay ang tanang buhatan sa kapulisan sa dakbayan ug probinsiya nagpadala man sa ilang mga personnel atol sa Semana Santa.
Bisan og wala silay nadawat nga hulga, giawhag sa CCPO ang publiko nga bantayan ang ilang palibot.
Kon adunay mamatikdan nga kadudahan, labing maayo nga motawag dayon sa pinakaduol nga police station aron maaksyonan dayon nila, butyag ni Dalogdog.