Refrigerated van maoy gibasol sa grabeng pagkaguba sa skywalk sa M.C. Briones St., Sudlon, Brgy. Maguikay, dakbayan sa Mandaue hinungdan nga napugos ang Dept. of Public Works and Highways (DPWH) sa pagpaguba niini sugod niadtong Huwebes sa gabii, Marso 30, 2023.
Matod ni Traffic Enforcement Agency of Mandaue (Team) executive director Edwin Jumao-as, sa interbyu sa Superbalita Cebu sa Sabado, Abril 1, 2023, nagpadayon ang ilang pagsubay sa mga closed circuit television (CCTV) footage sa mga karsada nga giagian sa refrigerated van.
Ang pag-igo nahitabo usa ka kaadlawon sa miaging semana.
Di kaayo maklaro ang footage sa CCTV nga ilang nakuha kay layo ra ang nahimutangan niini sa intersection sa may Pacific Mall.
Gipaneguro ni Jumao-as nga ilang pasakaan og kaso ang driver sa van sa iyang namugna nga kadaut sa kabtangan sa kagamhanan kon ila nang mailhan.
“Naigo gyud ang beam unya kaadlawon di gyud maklaro kay layo ra ang atong CCTV,” matod ni Jumao-as.
GIBASOL
Di kadto unang higayon apan mao ang labing grabeng pagkaigo sa beam sa skywalk kay sayo sa Marso, natapsingan usab kini og laing refrigerated van.
Iyang gibasol ang pag-ayo sa mga karsada nga mag-overlay ang kongkreto hinungdan nga mitaas ang level niini nga moresulta usab sa pagkasangko sa dagkong mga sakyanan.
Matod niya nga ilang gisugyot kon tukuron og balik sa DPWH ang skywalk nga hayan mahitabo sa 2024 kay adto na ang budget niini kuhaon, ipalayo kini sa eskina aron malikay nga maigo ang beam sa dagkong mga sakyanan.
Kinahanglan usab nga patas-an ang estruktura aron di masangko ang tag-as nga mga sakyanan.
Niingon si Jumao-as nga ang skywalk gigamit sa mga tinun-an sa ilang paglabang sa usa sa dakong highway sa Metro Cebu.
MAHUMAN
Naglaom si Jumao-as nga mahuman na ang pagtangtang sa tibuok estruktura sa Dominggo sa gabii ug maagian na sa mga sakyanan ang karsada sa Lunes, Abril 3.
Sa iyang bana-bana sa Sabado sa hapon, naa na sa 85 porsiyento ang natangtang sa estruktura.
Ang PLD Construction naggamit og crane aron mapaspasan ang pagtangtang sa estruktura.
Giangkon ni Jumao-as nga niadtong Huwebes, dihang una nilang gisirhan ang highway, nakamugna kini og grabeng kahuot sa trapiko.
“Unsaon sab ning (mga drayber) dagkong mga trak, anha man manubay sa gagmay nga mga dan. Di maghuot gyud,” matod sa opisyal.
Hinuon sa Sabado, matod niya nga niluag na ang dagan sa trapiko kay naka adjust ug nakatultol na ang mga motorista sa agianan.
Ang mga sakyanan nga padung sa norte makasubay sa G. Ouano St. gikan sa M.C. Briones St. dayon mo left turn sa S.B. Cabahug Street.
Sa mga sakyanan padung sa south, mga motorista makaagi sa P. S. Suico St. gikan sa J. P. Rizal St. dayon mo left turn sa M. Ceniza St. padung ngadto sa M.L. Quezon St.
Matod ni Jumao-as nga aron di masaag, sundon sa mga motorista ang mga signage nga ilang gipamutang. (REV, HIC)