Barrita: Luwas nga biyahe sa Semana Santa

Barrita: Luwas nga biyahe sa Semana Santa

Karong semanaha, gipaabot nga maghugop ang mga tawo sa mga bus terminal ug sa atong mga pantalan kay mopauli sa ilang tagsa-tagsa ka mga probinsiya ug kalungsoran aron magsaulog sa Semana Santa ug magpahimus sa taas kaayo nga holiday.

Sa mga kawani sa gobyerno, tunga sa adlaw o kutob ra sa alas 12:00 sa udto ang trabaho sa Abril 5, Miyerkules. Ang holiday maglakip sa Huwebes Santo, Biyernes Santo, Sabado de Gloria, Easter Sunday ug sa Lunes kay gisibog sa Malacañang ang Araw ng Kagitingan gikan sa Dominggo, Easter Sunday, ngadto sa Lunes.

Ang atong panghinaut mao nga luwas ang atong pagbiyahe pinaagi sa bus, barko ug eroplano atol sa taas nga holiday.

Nunot kini sa pagkasunog sa MV Lady Mary Joy didto sa kadagatan sa Basilan niadtong Marso 30 nga nikalas sa labing minos 31 ka mga kinabuhi samtang pito ang wa pa igkita.

* * *

Daghan na ang mga susamang hitabo. Ang labing grabe mao ang nahitabo niadtong Disyembre 20, 1987.

Ang MV Doña Paz nalunod human magkabangga ug ang oil tanker nga MV Victor duol sa kadagatan sa Marinduque. Gibanabana nga miabot sa 4,386 ka mga kinabuhi ang nakalas sa maong hitabo.

Ang labing ulahing hitabo nakaaghat ni Senador Grace Poe nga manawagan pag-usab sa pagmugna sa usa ka independent transport safety board nga pagtawgon og Philippine Transportation Safety Board.

Mao kini ang ahensiya sa gobyerno mga moimbestigar sa tanang mga aksidente o hitabo sa tanang matang sa transportasyon sa kadalanan, kadagatan ug kahanginan sa tumong mga malikayan ang susamang mga hitabo.

* * *

Kon atong mahinumdoman, niadtong bag-ong tuig, nikalit lang og kapawong ang air traffic system sa kaulohan. Kanselado ang tanang mga flight gikan sa Manila padung sa ubang mga lalawigan ug sa gawas sa nasod.

Bisan sa atong mga kadalanan, daghan gihapon ang nahitabong mga disgrasya.

Ang usa ka independente nga transportation safety board maoy mosusi kon kini tungod ba sa mga dautan nga mga sakyanan o kadanghag sa mga drayber.

Ang Pilipinas usa ka archipelgao nga dunay kapin sa 7, 100 ka mga isla, depende kon taub o hunas. Panahon na nga duna kitay usa ka independente nga transportation safety board aron maseguro ang kaluwasan sa atong pagbiyahe.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph