DAVAO DEL NORTE -- 200 ka mga buntis ang misalmot sa gipahigayong National Buntis Day didto sa Robinson’s Place, Tagum City niadtong Sabado, Abril 1, 2023.
Gibutyag nga pinaagi sa opisina sa City Health gisaulog sa lokal nga panggamhanan sa siyudad sa Tagum, kauban ang nahisgutang 200 ka mga buntis, ang National Buntis Day sulod sa tunga sa adlaw.
Matud pa nga kabahin sa maong selebrasyon ang pagpaminaw sa mga buntis sa mga lecture ug pagdawat sa libreng prenatal checkup, bakuna ug HIV screening.
Giingon nga mas nahimo pang exciting ang maong selebrasyon gumikan sa pa-raffle nga dunay mga maanindot nga papremyo apil ang freebies para sa pipila ka mga early bird mommies.
Sumala pa nga ang maong selebrasyon unang giplanohan nga ipahigayon nidtong Marso 10, 2023 apan gumikan sa mga kakulian di malikayan, wa mahinayon ug natanggong.
Apan tungod sa giingong panaghiusa sa lokal nga panggamhanan sa siyudad, kauban ang Philippine Obstetrical and Gynecological Society Inc., Pogs SMC Tagum Panabo Mati Area, Davao Regional Medical Center ug Robinson’s Place Tagum, nahimo gihapong posible ang maong selebrasyon.