Tungod sa kakuwang sa pundo ug prayoridad, 113 lang sa 174 ka mga parokya nag-estabilisar sa Cebu Caritas Inc., social action arm sa Archdiocese of Cebu, human sa usa ka tuig sa decree ni Arsobispo Jose Palma nga nagmando sa pag-estabilisar niini sa tanang mga parokya sa Sugbo.
“Dili tanan parokya establish na. Naa may mga parokya nga gideklarar siya nga parokya, pero wala pay simbahan. Wala pa gani kombento,” matod ni Rev. Fr. Alex K. Cola, Jr., Cebu Caritas president, atol sa press conference sa Huwebes, Marso 30, 2023.
Gipahibalo usab sa Cebu Caritas ang paglusad og balik sa “Alay Kapwa,” ang legacy local fund raising program niini, nga adunay tumong nga makatigom og P8 milyunes karong tuiga aron suportahan ang mga social action initiative niini.
Niadtong Marso 3, 2022, gipagawas ang Decree on the Establishment of Parish Caritas sa tanang mga Parokya sa Archdiocese of Cebu ug nagkanayon nga ang matag parokya kinahanglang magtukod og kaugalingong Parish Caritas.
Gipalig-on usab sa maong decree ang tahas sa Parish Caritas nga mao ang paghimo sa ilang tripod programs sa humanitarian, developmental ug hustisya ug kalinaw.
Sa pagkakaron, 65 porsiyento pa lang sa mga parokya ubos sa Archdiocese of Cebu ang adunay ilang Parish Caritas. Distrito 1 adunay 25; distrito 2 adunay 15; distrito 3 adunay 14; distrito 4 adunay 14; distrito 5 adunay 13; distrito 6 adunay 13; ug ang distrito 7 adunay 19.
Gibutyag ni Fr. Cola nga duna pay mga parokya nga nangita pa og pundo aron makapalit og kaugalingong yuta nga katukoran sa ilang buhatan sa Parish Caritas.
ALAY KAPWA
Ang Alay Kapwa gipatuman sa tibuok nasod sa tanang mga parokya sa Simbahang Romano Katoliko atol sa panahon sa Kwaresma. Gitukod kini sa Catholic Bishops’ Conference of the Philippines (CBCP) atol sa Kwaresma niadtong 1975.
“To respond to the call of Pope Paul VI nga nindot kaayo ni ang simbahan ba nga nagpakabana, simbahan nga dili lang kutob nga ra ang mga kaparian kutob sa parokya,” matod ni Fr. Cola.
Aron mapundohan ang mga proyekto niini, ang Cebu Caritas mopahinungod og ikaduhang koleksiyon atol sa mga misa sa mga parokya sa Dominggo sa Kwaresma.
Sumala sa gimando sa CBCP, 20 porsiyento sa koleksyon ang gamiton isip standby fund alang sa kalamidad o humanitarian response, 48 porsiyento alang sa diocesan social action center development ug advocacy programs, ug 32 porsyento sa Caritas Philippines isip solidarity fund aron pagtabang sa mga diyosesis ug komunidad.
Ang target collection sa Cebu Caritas sa tibuok Lenten season kay P8 milyunes, nga katumbas sa giplanohang budget alang sa mga proyekto niini karong tuiga nga P8 milyunes ngadto sa P10 milyunes.
SERBISYO
Gawas sa kuwarta nga donasyon gikan sa mga mosimba, ang Cebu Caritas nidawat usab sa paghatod sa mga serbisyo ngadto sa publiko, ug alang niini, nakatukod kini og mga linkage sa gobiyerno ug non-government sector.
“Pananglitan, ang among rehabilitation project, nakig-coordinate kami sa mga LGU (local government units),” matod ni Rev. Fr. Alden John Baran, program director sa Cebu Caritas.
Matod niya nga sa pagpahigayon og rehabilitation projects sa Boljoon ug Argao, ang tagsa-tagsa ka mga lungsod nitanyag usab kanila og tabang.
Ilang gi-tap ang pipila ka mga institusyon sa edukasyon, sama sa Cebu Institute of Medicine, Cebu Doctors’ University, ug Cebu Technological University, aron magpadala og mga medical volunteer isip kabahin sa ilang humanitarian ug developmental programs.
Ang Integrated Bar of the Philippines of Cebu ug Cebu City chapters nakigtambayayong usab kanila sa paghatag og legal nga tabang alang sa hustisya ug kalinaw nga mga programa sa Cebu Caritas.
Si Fr. Baran niingon nga ang Cebu Caritas nakatabang sa 499,830 ka mga indibidwal nga naapektuhan sa bagyong Odette nga niigo sa Sugbo niadtong Disyembre 2021.
Matod pa niya nga human sa Semana Santa, mopahigayon sila og laing set sa medical, dental ug legal missions sa Barangay Buanoy sa Balamban sa central western Cebu. Ila usab kining dad-on sa San Remigio sa norte karong Abril 29.
Ang Cebu Caritas nakaalagad na sa 2,904 ka mga indibidwal sukad sa pagpadayon sa ilang mga programa sa pipila ka mga lungsod sa Sugbo sukad giluagan ang Covid-19 pandemic restrictions. (KJF, RRM)