GIDUGOK sa mga tawo nga buot magparehistro sa ilang mga Sim Card sa gilusad nga SIM Card Registration Caravan sa Compostela Municipal Gymnasium, Barangay Poblacion, Compostela, Davao de Oro niadtong Lunes sa buntag, Abril 3, 2023.
Ang SIM Card Registration nahisubay sa Republic Act 11934 o SIM Card Registration Act alang sa mga subscribers sa Smart, Globe, ug Ditto.
Gipahitabo ang caravan gumikan kay daghan pa nga mga molupyo sa lungsod nga wa pa makaparehistro sa ilang mga Sim Cards.
Buot sa lokal nga panggamhanan sa Compostela, ubos sa liderato ni Mayor Levi Ebdao, nga matabangan ang katawhan sa lungsod nga wala pa marehistro ang Sim Cards.
Maoy hinungdan nga gihimo ang maong SIM Card Registration Caravan sanglit ang deadline karon nang umaabot nga Abril 26, 2023.
Giklaro nga ang maong serbisyo libre ug walay bayad, dungan sa pagpahimangno sa katawhan nga magparehisto aron makapadayon sa paggamit sa ilang SIM cards.