Ang Cebu Provincial Board nitugot na sa pagpagawas sa gahin nga dul-an P500 milyunes alang sa road concreting project sa nagkalainlaing mga lungsod sa lalawigan sa Sugbo, atol sa ilang regular session niadtong Abril 3, 2023.
Si Bokal Andrei Duterte maoy nipalabang og resolution aron paghatag og gahom kang Cebu Governor Gwendolyn Garcia nga mapirmahan ang kontrata tali sa nagkadaiyang mga contractor, kinsa maoy nakadaog sa gipahigayon nga mga competitive public bidding.
Ang labing dako sa 20 ka mga road concreting project nga giaprobahan sa Sangguniang Panlalawigan mao ang P127.4 milyunes sa Daanlungsod Cabangahan road section (phase 2) sa Tuburan, Cebu nga adunay 316 ka adlaw nga pagtrabaho.
Ang proyekto pagadumalahon sa RCV Villamor Contruction ug JV Gonzalodo Enterprise alang sa labor ug materials.
Laing proyekto nga nakuha sa Gonzalodo Enterprise mao ang road concreting sa sityo Caluboan, Barangay Cabalawan, lungsod sa Sogod (P16.3 M), Ilihan-Can-anan road section sa lungsod sa Tabogon (P17.8 M).
Sila sab ang motrabaho sa Bingay-Nipa road section (phase II) sa lungsod sa Borbon (P94.1M), sityo Tambacong, Barangay Calmante paingon sa Secante Daan Proper sa lungsod sa Tudela (P18.9 M), Teguis San Francisco road sa lungsod sa San Francisco (P16.2 M ) sa Camotes islands.
Sa kinatibuk-an, ang Gonzalodo Enterprise nag-inusara nga nakakuha sa P163.3 milyunes nga balor sa mga proyekto gikan sa Kapitolyo.
Ang Rovilla Construction maoy nakadaug sa P56 milyunes nga Tapilon-Lanao diversion road section sa Daanbantayan.
Sila sab ang nakadaog sa P17.1 milyunes alang sa Libertad Odlot phase 1 road section ug P23 milyunes nga Libertad Odlot phase II road section sa Bogo City ug laing P16.6 milyunes sa Ban-Ban road section.