Diputado: Padre kura nga ‘hinguwarta’

Nadismaya ang usa ka lay minister.

Abtik kaayo ang padre kura nga mangolekta og donasyon sa mga parokyano. Lahi nga klase nga donasyon ang iyang naandan buhaton, kanang donasyon nga dili kabalibad ang gipangayoan.

Mura og pugsanay bitaw. Unya kon di mohatag ang gipangayoan, moyawyaw dayon unya maulawan na lang ang mibalibad kay mahibaw-an man sa katawhan ang iyang gibuhat.

Nahimo nang batasan sa maong padre kura nga mangayo og bisan unsa na lang pinaagi sa iyang donasyon nga pugsanay.

Gani, miabot na sa punto nga mahadlok na nga mosimba ang ubang parokyano.

Usa ka higayon niana, dihay meeting nga gipatawag ang padre kura, tinambongan sa mga sakop sa usa ka komiteba sa preparasyon sa kasaulogan sa pista, unya usa sa mitambong ang lay minister.

Gusto sa padre kura ang usa ka bongga nga kasaulogan, apil na ang bongga nga mga pagkaon, prutas, token para sa mga motambong nga mga bisitang Pare, apil na niini ang gitawag og cash token kada usa sa mga kaparian nga mitambong.

Sanglit daghan man ang kinahanglan nga preparasyon, apil na ang pagpadala sa invitation letters, apil na ang mga donation letters, mihangyo og gamay nga pang-gastos ang namunoan sa komitiba ilabi na kay mga batan-on ang mga sakop ug lumilihok sa maong komiteba.

Mibalibad ang padre kura nga way kwarta para sa maong kagastuhan. Gusto pa unta nga mohangyo ang mga lumilihok apan nakita nila nga di gyod mohatag og bisan gamay nga pang-gastos ang padre kura mao nga wa na lang sila mamugos.

Sa gawas na mopahungaw sa ilang kasagmuyo ang mga lumilihok.

Naunsa gyod nang paria na, hilabihan mangayo og bisan unsa na lang, unya di pa ra gyod pabalibad, unya mangayo lang mi og gamay pang-gastos-gastos apil na ang plitehan para sa paghatod sa mga suwat, balibad man, bagotbot sa mga lumilihok.

Tungod sa iyang nadungog, mitabang ang lay minister og hangyo nga angay tagaan pang-gastos ang mga lumilihok, total naa may kwarta nga pundo ang parokya.

Nasuko na hinuon ang padre kura ug gibalik-balik og sulti nga dili angay bayran ang serbisyo alang sa simbahan.

Nasagmuyo ang lay minister.

Kon mangayo og donasyon ang padre kura, way balibaray, bahala’g mona’s ginhawa ang gipangayoan. Apan kon pangayoan na og gamay nga pang-gastos alang sa usa ka mahinungdanong kalihukan, abtik kaayo mobalibad. Asa kaha ning espiritu aning tawhana, nakasaway ang lay minister.

* * *

Layo ra nas among parokya, misagbat ang nakadungog.

Ngano man?

Kon di ka malista sa envelope system sa parokya, dili ka misahan ug dili sab ka malubong. Kadtong nalista lang sa envelope system ang misahan ug pwede malubong sa sam-ang sa Katoliko, pasabot sa misagbat.

Sa among parokya gyod, adunay laing misagbat, aduna nay taripa ang obispo kon imbitahon nga pamisahon atol sa kasaulogan sa pista.

Kadtong mga lungsod nga dagko, P20,000 ang pangayo sa obispo, apil na ang gi-offer panahon sa misa. Kadtong dili kaayo dagko, P15,000 ang pangayo plus iyahon sab ang tanang offer sa misa.

Unya sa mga gagmay nga simbahan, P10,000 ang pangayo sa obispo.

Buot ipasabot, kon dili kabayad sa taripa, dili na moanha ang obispo. Sama sa negosyo na diay ang pagmisa karon, nakapangutana ang misagbat.