Brownlee gapanikad

Brownlee. (File photo)
Brownlee. (File photo)

Gihangop ni naturalized player Justin Brownlee ang “Redeem Team” nga giangga sa Gilas Pilipinas kabahin sa kampanya niini sa 32nd Southeast Asian Games nga ipahigayon karong Mayo 5-17, 2023 sa Cambodia.

Ang resident import sa Brgy. Ginebra Gin Kings sa Philippine Basketball Association (PBA) gitahasan nga maoy mangulo sa 28-man national pool diin pilion ang 12 ka mga magduduwa nga mopas-an og dakong obligasyon alang sa Pilipinas.

Nakatutok ang Gilas Pilipinas sa misyon nga bawion ang gold medal, nga giilog sa Indonesia sa 31st edition sa matag duha ka mga tuig nga kompetisyon nga gipahigayon sa Vietnam.

Nagkanayon si Brownlee nga nagpanikad na siya.

“I definitely kept up with last year, where they fell a little short. I’m looking forward to helping get the gold back,” matod ni Brownlee nga napatik sa www.abs-cbnnews.com.

Ang Pilipinas nakalangkat og 13 ka sunodsunod nga gold medals sa kompetisyon una nailog sa Indonesia ang truno pinaagi sa pagbuntog sa Gilas Pilipinas, 85-81, sa finals.

“Hopefully, everything works out, and we play hard,” matod ni Brownlee. “We work hard together to redeem the gold.”

Dihang nasayran ni Brownlee nga gitawag na ang umaabot nga puwersa sa Gilas Pilipinas nga “Redeem Team”, dali siyang nakasulti og “That’s nice, man, I like it.”

Nasayod si Brownlee kon kinsa ang iyang ikaparang sa Cambodia gumikan kay iya na man naharong ang uban niini dihang nagduwa siya sa Alab Pilipinas sa ASEAN Basketball League.

“I’m looking forward to seeing those guys,” matod ni Brownlee.

Kauban ni Brownlee nga mangulo sa pormahong bag-ong puwersa sa Gilas Pilipinas ang mga Sugboanong sila si PBA six-time MVP June Mar Fajardo ug Roger Pogoy, nga mao na lang ang holdovers sa mga ningkombati sa Vietnam.

Apil sab sa national pool mao sila si CJ Perez, Chris Ross, Marcio Lassiter, Japeth Aguilar, Scottie Thompson, Jamie Malonzo, Christian Standhardinger, Stanley Pringle Jr, Calvin John Oftana, John Paul Erram.

Mokompleto sa grupo mao sila si Michael Williams, Chris Newsome, Raymond Almazan, Norman Aaron Black, Arvin Tolentino, Kevin Louie Alas, Brandon Rosser, Deschon Winston, Karl Kevin Quiambao, Jerom Lastimosa, Mason Francis Amos, Benjamin Phillips III, Ariel John Edu, Michael Phillips, ug Jeremiah Gray. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph