Gisugat og dakong kalampusan ang unang benefit concert nga gi-organisar sa PNP Region 7 Officers’ Ladies Club (OLC) tungod kay gawas nga napuno ang venue, puwerteng lingawa sa audience.
Apan dili ni kantahan, bahakhak, ug sayawan lang kay aduna sab ni mga pagtulun-an ug espiritwal nga katagbawan.
Ang “Amore: A Night of Music and Compassion” niadtong Marso 25 sa Atlantic Hall sa Waterfront Cebu City Hotel and Casino nag-feature sa OPM Pop Diva Kuh Ledesma ug mga talented artist nga gikan sa lain-laing genre sama sa pop, opera, teatro ug komedya.
Wala mapakyas ang Cebuano fans kay gikanta ni Kuh ang iyang classic hits nga “Dito Ba?”, “I Think I’m In Love”, “A Long Long Time Ago”, “One More Try,” ug “Till I Met You,” ang iyang grand prize winning song sa 6th Metro Manila Popular Music Festival niadtong 1983.
Si Kuh nga usa ka born-again Christian nikanta usab og inspirational songs uban sa iyang mga testimoniya kon giunsa paghilap sa Ginoo ang iyang kasingkasing nga nagdala og maanindot nga mga mensahe sa paghinulsol ug pagbasol labi na ning panahon sa Kwaresma.
Daghan sab ang nakabantay sa kanindot sa awra ni Kuh ug kamahigalaon sa tanang gustong magpahulagway niya.
Ang maong dinner concert for-a-cause usa ka fund raising sa PNP Region 7 Officers’ Ladies Club (OLC) kansang mga sakop mga misis sa mga opisyal sa kapulisan.
“Happy kaayo mi kay despite limited time, preparation, and budget, we were able to fill the Atlantic Hall of Waterfront,” matod ni OLC-Region 7 President Leslie Lim.
Ang ilang beneficiary mao ang 45 ka mga PNP 7 personnel nga dunay mga seryusong balatian ug nanginahanglan og chemotherapy ug dialysis.
“We believe that charity begins at home so all proceeds of this event will go to PNP personnel undergoing medical crisis. In our organization, we want to have a meaningful purpose,” dugang ni Lim.
Lakip sa ni-perform sa concert silang “Charity Diva” Token Lizares, ang PNP Dancers ug “Asia’s Got Talent” semi-finalist Angel Mistress nga nakapahugyaw sa audience.
Wa usab magpauwahi ang pop-opera singer Jonathan Badon ug ang Boholano Pop Prince Genreid Estrada nga nikanta sa iyang unang single “Stronger Than Before” sa Star Records.
Tungod sa kalampusan sa “Amore” Concert, nadasig si Lim ug ang iyang pundok sa OLC nga mohimo pa og laing charity concert karong tuiga aron mas daghan pa silang matabangan ug mahalaran sa grasya sa Himaya sa Dios.