Bisan kon adunay nakit-an nga African swine fever (ASF) sa mga baboy nga gibutang sa mga pig pen sa dakbayan sa Sugbo niadto pang Enero, walay deklarasyon sa ASF outbreak sa siyudad ang Department of Agriculture (DA) tungod kay kini napugngan.
Gitutokan karon sa Cebu City Hall ang information campaign niini ug pagpatuman sa dugang protocol aron mapanalipdan ang industriya sa baboy sa dakbayan.
Ang kanhi Cebu City Veterinarian nga si Dr. Alice Utlang nipagawas og impormasyon, nga adunay nasuta nga mga kaso sa ASF sa Barangay Tisa, Budlaan, ug Bulacao niadtong Enero ug Pebrero.
Si Cebu City Veterinarian Jessica Maribojoc, sa usa ka interbyu ning Abril 5, 2023, nipasabot nga sa kaso sa Barangay Tisa ug Budlaan, adunay gikataho nga nangamatay sa mga baboy hinungdan nga ang Department of Veterinary Medicine and Fisheries (DVMF) nihimo og surveillance ug hugot nga monitoring sa nahabilin nga mga baboy, apan kini nangamatay sa wala pa mogawas ang resulta sa tests.
Matod ni Maribojoc nga ang mga alad sa mga baboy walay silingan nga alad sulod sa 500 metros nga maoy hinungdan nga kini napugngan.
Matod ni Maribojoc nga ilang gitambagan ang mga apektadong hog raisers nga dili magbuhi og baboy sulod sa unom ka buwan ug mohimo og disinfection sa mga alad sulod sa tulo ka sunodsunod nga buwan.
Giklaro usab niya nga ang kaso sa ASF sa Barangay Bulacao namatikdan lamang niadtong Marso 8, ug dili Enero 26, sukwahi sa datos nga gipagawas ni Utlang.
Si Maribojoc niingon nga bisan kon adunay namatikdan nga kaso sa ASF sa dakbayan sa Sugbo, ang Bureau of Animal Industry (BAI) lang sa DA ang makadeklarar.
“(In the case of Cebu City), it was controlled within 15 days, and only DA-BAI can declare the status of zoning (that’s why) Cebu City was still (considered in) green (zone that time),” matod ni Maribojoc .
Matod ni Maribojoc nga madeklarar lang ang outbreak kon base sa resulta sa surveillance, dili makontrol ang kaso sulod sa 15 ka adlaw ug adunay transmission sobra sa usa ka barangay, sama sa nahitabo sa Carcar City diin sobra sa usa ka barangay ang apektado.
Dili usab gusto ni Maribojoc nga ipahibalo sa publiko ang mga barangay nga gibantayan o gibantayan pag-ayo aron mapugngan ang mga “predatory traders” sa pagpahimulos sa mga backyard breeder.
Siya niingon nga adunay nataho nga mga insidente diin ang pipila ka mga negosyante mamalit og baboy gikan sa backyard breeders sa mas barato nga presyo. (JJL)