Kon madugangan ba o magpabilin gihapon’g usa ra ka world boxing title ang maangkon sa Pilipinas, kini maoy matubag karong buntag (Abril 9, 2023 dinhi sa Pilipinas) sa dihang mosuway paglangkat si kanhi world champion Marlon Tapales sa duha ka mga título sa super bantamweight division.
Ang 31-anyos nga Tapales mosaka sa ring nga usa ka dakong biya o underdog batok sa wala pay pildi nga si Murodjon Akhmadaliev sa Uzbekistan sa away nga ipahigayon sa Boeing Center sa Tech Port sa San Antonio, Texas, USA.
Si Akhmadaliev nga maoy kampiyon sa WBA ug IBF super bantamweight division adunay 11-0 nga record, walo niini iyang gipang-knockout.
Layo ra man tuod káayo ni sa 36-3, 19 KOs nga baraha ni Tapales, kon experience ang hisgutan, apan sa naobserbahan atoa mosandig ang bintaha sa 28-anyos nga Uzbekistan fighter tungod sa gitas-on, gidak-on, edad ug sa abilidad niini.
Sukad malabni ang unified WBA-IBF super bantamweight belt niadtong 2017 pinaagi sa split decision nga kadaugan batok ni Danny Roman sa USA, si Akhmadaliev katulo na nakadepensa sa título diin usa ra niini ang nakaabot og 12 ka rounds.
Usa sa iyang gipakamang mao ang kanhi world champion nga si Ryosuke Iwasa. Si Iwasa, niadtong 2017, mi-knockout usab ni Tapales sa ilang title fight.
Sagad sa mga challenger nga nisuway og langkat sa iyang korona, susama og ring experience ni Tapales.
Hinuon, si Tapales kinsa naila usab nga may igong kaisog ug determinasyon, mirehistro og knockout nga kadaugan sa uwahi niyang tulo ka mga away.
Nahimo siyang mandatory challenger human niya paundanga ang Hapon nga si Hiroaki Teshigawara niadtong 2018.
Dako ang iyang pagsalig nga taliwala sa iyang pagka underdog iyang mahuboan sa bakos ang 2016 Olympic silver medalist.
Usa sa posibli niyang mapahimuslan mao ang hataas nga bakasyon ni Akhmadaliev, kinsa wa makaaway sulod sa siyam ka mga buwan human mabuak ang kamot niini atol sa iyang pagdepensa batok ni Ronnie Rios.
Sanglit kining awaya naatol man sa Easter Sunday o ning Pasko sa Pagkabanhaw, dili nato hingpit isalikway nga makahagdaw og maayong bunga ang penetensiya unya ni Tapales nga mao ang pagkabanhaw isip usa na usab ka world champion.
Good luck higalang, Marlon.