Kada Semana Santa, daghan ang magplano nga mag Biseklita Iglesia kun manuaw og pito ka mga simbahan nga magbiseklita, inay magsakay og de makina nga mga sakyanan.
Kami hinuon sa akong mga anak ug asawa wa mi nakasuway niini sukad mi nagbiseklita as family. But akong nabantayan karong panahona, minos ang mga nagbiseklita nga nanuaw og mga simbahan.
Una gud nakong nakita nga problema kaning safe nga binlanan sa bike. Pila ra man intawon nang biseklita, mabitbit o maguroy, di sama sa motorsiklo nga bug-at. Mao ni ang akong na discover dihang kami sa akong mga amigo nag bike nga nanuaw og mga simbahan.
Usa sa maayo unta nga buhaton sa mga parokya mao ang pagbutang og bike racks nga duol, makita sa tag-iya sa bike ang iyang “kabayo” aron malantaw from time to time. Apan di ni applicable sa tanang mga simbahan nga daginuton kaayo og space sama sa Sto. Rosario ug Basilica Minore del Santo Niño.
Daghang mga simbahan dinhi sa urban area nga lisod ang parking area tungod kay nagkadako ang population, nagkadako sab ang panginahanglan sa pagtukod og bag-ong mga pasilidad.
LONG RIDE
But mas nindot karon nga Semana Santa kay taas kaayo ang holiday. Sagad sa mga buhatan nag half day niadtong Miyerkules, busa taas ang panahon sa pagpangandam. Mao ni ang panahon unta sa long ride, as long ride nga sobra sa 100 kilometers nga one way.
Kaya ba? Yes kaya kaayo. Labina kon nigikan niadtong Huwebes unya miuli karong adlawa. Duna pay time sa pagpahuway kay ugma, Abril 10, holiday gihapon.
Apan niadtong dunay mga sakyanan nga makargahan og mga biseklita, hayan nagdala ug didto na lang sa dapit nga ilang gipuy-an nagsikad taliwa sa kainit sa panahon.
Lahi ra ang pagsuroy kon magsikad tungod kay hinay, makakita ug makaobserbar ka sa mga lugar nga maagian. And I bet, makadiskobre ka asa ang nindot nga tan-awon ang pagsubang sa adlaw o pagsawop niini.
O asa ang lamiang kan-anan o coffee shop. Asang dapita ang labing lamian nga delicacy sa usa ka lokalidad ug ang labing barato apan maanindot nga puy-an.
Mao ni ang akong mga kasinatian dihang nag bike pa ko og sige sa lainlaing mga dapit dinhi sa Cebu.
DISKOBRE
Ang usa sa maanindot sa sikad mao ang pagdiskobre og mga dapit. Mao ni ang experience sa among anak nga si Marylove. Asa ang lami, nindot apan barato nga kan-anan og coffee shop. O asa ang nindot nga talan-awon daplin sa dagat.
Grabe man sab ni siya mosuroy nga magsikad kay moabot og kapin 100 kilometers padung ug balik.
Ang nakanindot sa biseklita kay kon gusto kang mosaka og bukid unya lisod ang agianan, mahimo rang imong guruyon, padulhog ug saka.
Mao na ang giingon nga way di maadto sa biseklita basta imong makaya ang pagtulod o pagtindak, saka o kanaog sa bisan asa nga dapit nga imong gustong adtuon.
Nalingaw ka ba sa imong Semana Santa sa pagsige og biseklita?