Barrita: Unsaon pagsumpo sa pagkatap sa ASF?

Barrita: Unsaon pagsumpo sa pagkatap sa ASF?

Ang ulahing African swine fever (ASF) Zoning update sa Bureau of Animal Industry (BAI) sa Department of Agriculture nag-ingon nga hangtod sa Marso 27, 12 na ka mga siyudad ug kalungsoran sa lalawigan sa Sugbo ang ubos sa red (infected) zone.

Mao kini ang mga siyudad sa Bogo, Carcar, Cebu, Mandaue, Lapu-Lapu ug Talisay ug ang mga lungsod sa Cordova, Liloan, Minglanilla, San Fernando, Sibonga ug Tuburan. Ang ASF unang na-detect sa syudad sa Carcar niadtong Marso 1, sumala sa Provinacial Veterinarian’s Office.

Ubos sa National Zoning and Movement Plan for the Prevention and Control of ASF sa Department of Agriculture, ang red zone mao ang mga lugar nga konpirmado ang ASF outbreak. Samtang ang dark green (free) zone mga lugar nga labing menos ang risgo sa ASF transmission.

* * *

Apan matod pa ni Dr. Alice Utlang, kanhi Cebu City veterinarian, wa man diay sa Carcar City magsugod ang ASF sa lalawigan sa Sugbo. Matod pa ni Dr. Utlang, ang unang kaso sa ASF sa lalawigan sa Sugbo unang natala sa Barangay Vito, Minglanilla sa Nobyembre 16, 2022 pa.

Kapin kini sa tulo ka buwan ug tunga sa wa pa ipahibawo ni Dr. Mary Rose Vincoy, Cebu provincial veterinarian, nga napalgan ang unang kaso sa ASF sa Carcar City sa Marso 1. Maayo unta kon magpuyo lang ug di molaag ning kagawa kon di ipahibawo.

Gikonpirmar kini sa usa ka wa magpaila nga opisyal sa Barangay Vito, Minglanilla nga nahinabi sa Sun.Star. Matod niya, sa buwan sa Oktubre 2022 pa lang, duna nay mga taho sa mga baboy nga nangasakit.

* * *

Balikon nato dinhi ang advisory sa Department of Health nga ang ASF di makadaot sa panglawas sa tawo. Manakod ug makamatay kini sa baboy ra. Ayaw na lang sab og kaon anang mga baboy nga namatay sa sakit kay mora og tinuyoan na gyud na.

Hinuon, way gikataho nga daghang mga baboy nga nangamatay sa lalawigan sa Sugbo, gawas lang niadtong 141 ka mga baboy sa Barangay Can-asujan sa siyudad sa Carcar nga nga gipatay tungod sa mando sa culling sa Bureau of Animal Industry.

Unsaon man pagsumpo ang pagkatap sa ASF karon nga 12 na ka mga siyudad ug mga lungsod ang kompirmado nga natakboyan sa ASF? Wa bay laing paagi gawas sa pagpatay sa mga himsog pa nga mga baboy sud sa 500 metros nga radius? Sa sunod, maayong maglagyo na ning mamuhiay og baboy.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph