Nakabihag pa ang Utah Jazz sa hinapos nga bahin sa National Basketball Association (NBA) regular season, mismo ang Western Conference leader Denver Nuggets, 118-114, ang ilang gipaluhod kagahapon sa Salt Lake City, United States.
Mihimo og career-high 28 puntos si Ochai Agbaji aron pangulohan ang Jazz sa kadaugan.
Si Luka Samanic nakumagna pud og career-high 23 puntos ug walo ka rebounds, samtang miamot si Kris Dunn og 19 puntos ug season-high 14 ka assists ubanan sa walo ka rebounds alang sa Jazz.
Giputol sa Jazz ang ilang four-game losing streak. Mao pud kini ang ikaduhang daog sa team sulod sa 10 ka duwa.
“We did a good job tonight making Denver play a type of game they don’t want to play,” matod ni Jazz coach Will Hardy. “We wanted them to play over the top of us if they were going to beat us.”
Di na makasulod ang Jazz sa play-in bitbit ang 37-44 nga baraha kay anaa kini sa ika-12 nga pwesto sa Western Conference standing.
Si Kentavious Caldwell-Pope mipuntos og season-high 21 alang sa Nuggets. Si Jamal Murray nidugang og 20 puntos ug lima ka assists, samtang nitunol si Aaron Gordon ug Michael Porter Jr. og 15 puntos matag-usa. Ang MVP candidate Nikola Jokic mitali og 10 ka rebounds ug 10 ka assists.
Napilde ang Denver kalima sulod sa unom ka duwa. Apan bisan paman niini nagpabilin silang numero uno sa Western Conference dala ang 52-29 nga rekord.
Usa na lang ang nahabilin nga duwa sa Nuggets sa regular season, kini batok sa Western Conference contender Sacramento Kings karong Lunes. (RSC)