PANABO CITY, Davao del Norte -- Naluwas ang usa ka 17-anyos nga babaye human misuway unta kini og ambak sa tulay didto sa Purok Lapulapu Coastal Road, Barangay San Pedro, Syudad sa Panabo, sa nakalabay nga semana.
Base sa report, naluwas sa Panabo City Coast Guard Sub-station ang nahisgutang dalaga kinsa moambak na unta, apan nadala sa hangyo sa mga rescuers hinungdan nga naluwas kini.
Dihang ilaha na kining nagunitan, ilaha dayon nga gialam-alaman ug dali kining gidala sa Women and Childrens Protection Desk (WCPD) sa Panabo City Police Station aron nga matabangan sa ginaagian niining suliran ug mapaubos sa counseling.
Wala hinuon gikabutyag sa awtoridad unsay hinungdan sa pag-ambak unta sa dalagita gikan sa tulay.
Kung duna kamo'y mga gihambin sa galamhan ug nanginahanglan kamo og tawo nga maistoryahan sa inyong gidala nga kasubo, ug uban pang mga mental health crisis, puwede kamo nga motawag sa National Center for Mental Health, 0917-899-8727 (USAP), 7989-8727 (USAP) naa sab ang Hopeline, 0917-558-4673; 0918-873-4673; 8804-4673 2919 (toll-free for Globe and TM).