ALANG sa pagtabang sa gastuhon ug sa pagpatambal ingon man ang pag-atiman sa mga indigent cancer patients, si Davao City First Congressional District Representative Paolo Duterte ug laing duha ka mga magbabalaod nisugyot sa pagtukod og P10 bilyon nga pundo niini.
Si Duterte, uban ni Benguet Rep. Eric Yap ug ACT-CIS Partylist Rep. Edvic Yap, niingon nga ang ilang sugyot nga gilatid sa House Bill (HB) 7687 nagtumong sa pagpalig-on sa kasamtangan nga cancer assistance fund nga gimando ubos sa National Integrated Cancer Control Act (Republic Act 11215).
Ilang gitumbok nga bisan pa sa pagpatuman sa RA 11215 ug sa pagmugna niini nga pundo sa pagtabang, ang mga pasyente sa canser gikan sa mga panimalay nga ubos ang kinitaan padayong nagpas-an sa pinansyal nga palas-anon sa ilang medikal nga pag-atiman ug pagtambal.
Ubos sa maong balaodnon, ang ilang gisugyot nga P10 bilyones nga Cancer Medicine and Treatment Fund dumalaon sa Philippine Health Insurance Corporation (Philhealth) pinaagi sa mga accredited nga government hospital niini.
“The program shall be limited to indigent and underprivileged cancer patient beneficiaries to be identified by PhilHealth in close coordination with the Department of Social Welfare and Development (DSWD), the Department of Health (DOH), and the Department of the Interior and Local Government (DILG),” saysay sa balaudnon.
Human sa pagmugna sa pundo ug sa inisyal nga gahin nga P10 bilyon, ang Nasudnong Kagamhanan kinahanglang maglakip sa gikinahanglang kantidad aron mapadayon ug matuman ang mga tumong sa pundo sa tinuig nga budget sa Department of Health (DoH), sumala sa balaudnon.
Usa ka pagtuon nga gihimo sa University of the Philippines Manila’s Institute of Human Genetics nasuta nga 189 sa matag 100,000 ka Filipino ang adunay cancer kini kon itandi sa upat ka Filipino ang mamatay sa cancer matag oras, o 96 ka cancer patients kada adlaw.
Ang cancer, nga nakaapekto sa tanan nga mga grupo sa edad, karon ang ikaduha nga nag-unang hinungdan sa pagkamatay sa nasud pagkahuman sa mga sakit sa kasingkasing ug sistema sa ugat, sumala sa pagtuon sa UP.
Niadtong 2020, kapin sa 150,000 ka bag-ong kaso ug 90,000 ang namatay ang natala. Sa unang bahin sa 2021, kapin sa 27,000 ka nangamatay tungod sa cancer ang natala sa Philippine Statistics Authority (PSA), o 9 porsyento sa kinatibuk-ang nangamatay niining panahona.