Giaprobahan sa Sangguniang Panlalawigan sa Sugbo niadtong Abril 3, 2023 ang report sa committee on ways and means sa ordinansa sa lungsod sa Barili nga maoy nagtugot sa ilang local government unit nga makautang og P200 milyunes aron igasto sa pagtukod sa ilang duha ka andanang public market.
Si Provincial Board Member Glenn Anthony Soco, vice-chairman sa komitiba, maoy niduso sa iyang committee report ngadto sa Sangguniang Panlalawigan (SP) aron aprobahan ang Ordinance No. 04-D28-2022.
Sa ordinansa, nalatid ang pagpanghuwam sa munisipyo sa Barili og P200 milyunes sa Land Bank of the Philippines (LBP).
“Confirming, ratifying and approving the proposed borrowing of the Municipality of Barili in the amount of P200,000,000 to fund the construction/modernization of public market located at Poblacion, Barili, Cebu as the first drawdown from the approved Omnibus Term Loan Facility amounting to P200,000,000 of the Land Bank of the Philippines,” mabasa sa committee report ni Soco.
Niadtong Nobiyembre 19, 2021, si kanhi Barili mayor Julieto Flores, uban sa representative sa LBP, nipahigayon og ceremonial signing sa memorandum of agreement.
Kon mahuman na ang tukurong merkado, kini makapahiluna og 700 ka stalls.
Si Flores niingon kaniadto nga 20 porsiyento sa Internal Revenue Allotment (IRA) sa lungsod gamiton isip garantiya sa utang nga bayran sulod sa 10 ka tuig.
Matod niya nga niluwat na og clearance ang Commission on Audit (COA) aron makapadayon sila sa proyekto.
Ang pagtukod sa bag-ong merkado giuyonan sa vendors sa karaang merkado sanglit makahatag kini og dugang atraksyon, hamugaway sa pagpamalit.
Gituohan nga modagsa pa ang daghang mga tawo sa merkado kon mahuman na.