MATI CITY, Davao Oriental - Dili man kini sama sa kadak-on sa Dubai Fountain, apan nagdibuho gihapon kini og "ooohs" ug "ahhs" gikan sa mga nagtan-aw sa pinakaunang Musical Dancing Fountain (MDF) sa dakbayan sa Mati niadtong Dominggo, Abril 9, 2023.
Ang seremonya sa MDF gipangunahan ni Mati City Mayor Michelle Nakpil Rabat didto mismo sa Mayor FGR Park and Baywalk kauban ang gatosan ka mga Matinians nga midagsa bisan pa man miulan sa wala pa ang opening.
Nasayran nga taas-taas usab ang pagplano sa kamugnaan sa MDF, dungan sa gihimo nga renobasyon sa MFGR Park and Baywalk nga gidesisyonan sa mayor.
Human sa renobasyon niadtong 2021, nakita sa mga tawo ang daw olympic-size pool-like na estraktura sa tunga sa maong parke.
Sa wala pa mahibaw-i sa kadaghanan, ang mayor sa dakbayan nakahuna-huna na og moderno nga musical dancing fountain sa maong dapit bisan sa wala pa magsugod ang renovation sa MFGR Park ug Baywalk.
“It would be like a mini-version of the dancing fountain in Dubai that we all see in the social media. That is how I envisioned that structure in baywalk that most people see as but a simple reflection pool before,” Matod pa ni Mayor Rabat.
Ang Buildibility Construction Corporation maoy kontraktor nga gikuha sa City of Mati LGU alang sa MDF. Ang MDF show ipahigayon matag Biyernes, Sabado ug Dominggo alas 7 ug alas 8 sa gabii. (PR)