Gibungkag sa Cebu City Government ang 13 ka mga ilegal nga estruktura nga anaa sulod sa Doña Pepang cemetery, Brgy. Tejero, dakbayan sa Sugbo sa Martes, Abril 12, 2023.
Ang Prevention Restoration Order Beautification Enhancement (Probe), Department of Public Services (DPS), Cebu City Transportation Office (CCTO) Cebu City Police Office (CCPO) ug ubang buhatan ubos sa Office of the Mayor maoy nagtinabangay sa pagpatuman sa kamanduan ni Mayor Michael Rama.
Si Ramil Ayuman, special assistant to the mayor, nagkanayon nga ang dul-an sa usa ka ektarya nga sam-ang himuon nang Heritage Park.
Human sa clearing operation sa Abril 13, ang dapit kuralon sa City Government ug pabutangan og blue guards nga mobantay niadtong mosuway og tukod pagbalik.
Ang Department of Engineering and Public Works (DEPW) nangandam na sa ilang Program of Works and Estimates (Powe) alang sa pag-develop sa dapit.
Ang City Government nigahin og P50 milyunes sa development project diin ipahimutang ang amphitheater.
Butangan sab og lapad nga kalsada sa palibot ug palambuon pa ang upat ka dagkong mga musoleyo aron mahimong atraksyon sa katawhan.
Ang pag-develop sa usa sa labing karaang mga sementeryo sa Sugbo tipik sa Singapore-like Cebu City ni Rama, kansang programa iyang buhaton sulod lang sa tulo ka tuig.
Ang mayor nangayo og P50 bilyunes ilawom sa iyang proposed annual budget nga giaprobahan sa City Council.
Ang kantidad adto kuhaon sa koleksyon sa buhis sama sa real property ug business taxes uban sa national tax allotment.