Nagkalainlaing opinion ang akong nabati kalabot niining katuyoan ni Police Regional Office 7 Director Police Brigadier General Anthony Aberin nga pag-organisar sa mga estambay aron maoy motabang sa kapulisan sa pagsulbad sa kriminalidad sa rehiyon ubos sa iyang kamandoan. Ang tumong ni General Aberin mao ang pagamit niining maong mga tawo aron makatabang kanila sa pag-monitor sa kalihukan sa mga malapason sa balaod sa ilang dapit kun teritoryo aron ireport kini ngadto kanila.
Dili na man bag-o kining ingon niini. Mao man kini ang gibuhat hangtod karon sa mga tinugyanan sa balaod. Gitawag lang hinuon kini og “asset.” Kadaghanan kanila mga police character usab. Sila maoy pangutan-on sa mga polis kon adunay krimen nga mahitabo sa ilang teritoryo. Dili kini sila organisado hinunoa sekreto kaayo ang ilang kalambigitan niining maong trabaho. Wala hinuon ako masayud kon unsa ang bayad o pabor nga madawat niining maong mga asset bugti sa impormasyon nga ilang mahatag ngadto sa kapulisan.
Unsa may buot ipasabut niining pag-organisar sa mga estambay? Buot bang ipasabut nga sama sa ubang mga organisasyon nga adunay ngalan ang ilang pundok ug maila na sila sa komunidad? Samtang ako nagtuo nga dalaygon ang tumong ug tuyo sa heneral, apan kon mao kini, nagtuo ako nga dili na epektibo ang trabaho sa mga asset tungod kay mabantayan na man sila sa mga malapason sa balaod. Kuyaw sab nga pamatyon sila sa mga kriminal apil na ang sakop sa ilang pamilya. Anaa man guy sinultihan sa underworld nga “piyait must die.”
* * *
Daghang nangutana niadtong pagbisita kuno sa mga opisyal sa local nga kagamhanan ug sa mga barangay sa Davao City niadtong katapusang semana sa Marso. Sumala sa mga tinubdan nga mga mayor, konsehal, barangay kapitan ug ubang mga opisyal sa gobiyerno ang gidapit kuno sa usa ka panagpundok didto sa maong dapit. Sumala pa opisyal ang maong biyahe, mao nga ang plete, hotel, ug ubang galastuhan giabaga sa gobiyerno gawas pa sa per diem nga nadawat sa mga giimbitar. Daghang nangutana kalabut sa maong panagtigum tungod kay wala man kaayo kini hatagi og pagtagad sa media. Ang mga Marites nagduda nga kalabut sa partisan politics ang maong meeting. Alang kang kinsang kandidatura nga national government man ang nag-imbitar? (mannyrabacal1144@gmail.com)