66-anyos miuwang sa lalis, gitigbas

(Stock Photo)
(Stock Photo)

DAVAO DEL NORTE — Samdan nga gidala sa balay tambalanan ang 66-anyos nga lola human gitigbas samtang mipataliwa sa lalis sa mag-asawa didto sa Purok 3, Barangay Kinamon, Santo Tomas alas 11:17 sa gabii, Martes, Abril 11, 2023.

Ang biktima giila nga si Pacita Romera Acuman, dalaga, way trabaho samtang ang suspek nailhan nga si Edwin Tacugue Tesora , bayaw sa biktima, 49, minyo, mag-uuma, pulos molupyo sa Purok 3, Barangay Kinamon sa maong lungsod.

Base sa inisyal nga imbestigasyon, ang biktima miuwang sa lalis ni Tesora ug sa asawa niini apan sa kalit lang gitigbas sa suspek ang biktima gamit ang mahait nga sundang nga miresulta sa pagkasamad sa iyang tuong bukton.

Gidali ang biktima sa pagdala sa Santo Tomas Health Center aron siya matambalan apan wa madugay gibalhin ngadto sa Davao Regional Medical Hospital sa siyudad sa Tagum alang sa dugang medikasyon.

Samtang ang suspek nasikop sa mga miresponding pulis ug gikustodiya sa Sto. Tomas Municipal Police Station alang sa tukmang disposasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph