Bisan sa nagkadaghang mga kaso sa coronavirus disease (Covid-19), wala pa giduso sa Department of Health (DOH) ang pagbalik sa mandatory facemask policy sa nasod.
Sa hamubo nga pamahayag, ang DOH niingon nga walay rekomendasyon alang sa pagbanhaw sa mandatory nga pagsul-ob sa mga facemask aron mapugngan ang Covid-19.
“Currently, there is no recommendation from the Department of Health on the amendment of the Executive Order No. 7 regarding the wearing of face masks,” matod sa DOH.
Niadtong Oktubre 2022, si Presidente Ferdinand Marcos Jr. nag-isyu sa Executive Order 7, nga nagtugot sa boluntaryong pagsul-ob sa mga facemask sulod ug sa gawas nga mga dapit.
Sayo ning semanaha, bisan pa, gisubli ni Iloilo City Mayor Jerry Treñas ang polisiya nga nag-require sa tanang empleyado ug bisita nga magsul-ob og facemask sulod sa City Hall.
Ang kamandoan ni Treñas nahitabo human ang mayor nataptan sa Covid-19 ug ning bag-o na-admit sa ospital.
Sa nasudnong lebel, ang DOH nagreport usab sa bag-o nga pagtaas sa mga kaso sa Covid-19 diin ang nasod adunay average nga 278 ka mga kaso matag adlaw gikan sa Abril 3 hangtod 9.
Gipakita usab sa mga projection sa DOH nga ang mga kaso mahimong mosaka sa 611 kada adlaw sa Mayo 15.
Inay nga iduso ang pag-amendar sa Executive Order 7, ang DOH nagkanayon nga padayon kining nagpahinumdom sa publiko sa paggamit sa individual risk assessment sa paggamit og layers of protection, sama sa pagsul-ob og mask.
Giawhag usab niini ang publiko nga magpabakuna ug mapalig-on batok sa Covid-19.
Alang sa mga nakasinati og mga sintomas sa Covid-19, ang DOH niingon nga hugot nga gitambagan sila nga i-isolate ang ilang kaugalingon aron malikayan ang dugang nga pagpanakod. (HDT sa SunStar Philippines)