DAVAO DEL NORTE - Naospital ang biyudo human nahagbong sa punoan sa mangga nga gisaka sa Sitio Bagacay, Barangay Tagbitan-ag, Island Garden City Of Samal (IGaCos) niadtong Abril 13, 2023.
Ang biktima giila nga si Charlito Apatan Cayunda, 47, laborer ug molupyo sa Barangay Sto Nino, Babak Dist, IGaCos.
Base sa inisyal nga imbestigasyon sa mga awtoridad, usa ka Sinotruk nga dunay plakang NCNQ741 ug gimaneho ni Manny Lapena naglabigar sa dalan padung sa Brgy. Tagbitan-ag.
Apan pag-abot sa Sitio Bagacay, kalit lang nabitik sa pisi si Lapena nga nagbitay sa dalan.
Matud pa nga ang pisi gihikot sa hagdanan nga kawayan nga maoy gigamit sa biktima sa pagsaka sa punoan sa mangga hinungdan nga nabira kini ug nawad-an og balanse ug nahagbong sa mangga.
Ang mangga dunay gitas-on nga di moubos sa 15 metros.
Tungod niini, ang biktima nakahiagom og samad ug bun-ong sa lawas ug gidali pagdala ngadto sa Davao Norte Hospital Samal Zone aron matambalan.
Apan wala madugay, gibalhin siya pagdala ngadto sa Southern Philippines Medical Center ( SPMC ) sa Bajada, Davao City alang sa dugang medikasyon.
Samtang ang drayber ug ang sakyanan nga nalambigit sa insidente gikustodiya sa IGaCos Police Station alang sa tukmang disposasyon.