Wala mosibog ang Cebu City Hall, inay giduso niini ang kaso sa Compania Maritima area, nga dugay nang gilantugian, ngadto sa Court of Appeals, upat ka buwan sukad si Judge Soliver Peras sa Regional Trial Court (RTC) Branch 10 sa Cebu City nisulat sa desisyong naghatag sa Cebu Port Authority (CPA) sa katungod sa pagpanag-iya sa maong propiyedad.
Ang Cebu City Legal Office (CLO), niadtong Abril 4, 2023, nisang-at og 57-ka-panid nga petisyon sa CA, nga naghangyo nga balihon ang hukom sa RTC.
Si City Legal Officer Jerone Castillo, sa usa ka interbyu sa Biyernes, Abril 14, niingon nga ang Siyudad nakahukom sa pagpasaka sa petisyon ngadto sa CA human ang ilang motion for reconsideration gisalikway niadtong Pebrero.
Ang mga petitioner sa pleading mao sila si Cebu City Mayor Michael Rama ug Acting City Assessor Eustaquio Cesa, samtang ang mga respondent mao sila si Peras, presiding judge sa RTC Branch 10, ug ang Republic of the Philippines nga girepresentahan sa CPA.
Ang CLO nisang-at og petisyon alang sa certiorari ug nag-ampo alang sa pag-annul ug pagtangtang sa Disyembre 2022 nga hukom nga naghatag og writ of preliminary injunction sa CPA.
Nipetisyon usab ang CLO ngadto sa CA nga i-overrule ang hukom sa trial court sa Pebrero 2023 nga nagsalikway sa motion for reconsideration ug supplemental motion for reconsideration sa City Hall.
Niadtong Disyembre 23, 2022, sa 15 ka pahina nga desisyon nga gisulat ni Peras, ang korte nitugot sa appeal sa CPA alang sa writ of preliminary injunction nga magdili sa Cebu City Government sa pag-okupar sa bisan unsang bahin sa Compania Maritima area.
Ang Siyudad nangatarungan nga ang CPA ”no clear and unmistakable right” nga panalipdan tungod kay ang Compania Maritima dili bahin sa distrito sa pantalan sa Sugbo nga nalatid sa Executive Order No. 448 nga pinetsahan og Pebrero 5, 1975 nga nagtukod sa custom zone alang sa pantalan sa Sugbo nga adunay gilapdon nga 93,321 metros.
Ang Siyudad, sa petisyon niini, nipasangil nga adunay dili awtorisado nga survey sa pribadong geodetic engineer nga naghimo sa gidak-on sa port district area nga niburot ngadto sa 119,570 square meters, ug ang Compania Maritima, “a tract of land without any ships docking at the area, no port operations conducted by the CPA,” nalakip sa survey.
Giinsistir sa Siyudad nga “there is no substantial invasion of a right” tungod kay ang Compania Maritima “dili bahin sa distrito sa pantalan.”
Gipahayag usab sa Siyudad nga wala nay mga barko nga nagdunggo sa atubangan ug sa tuo nga bahin sa building, ug ang kalihokan sa konstruksyon nga gihimo duol sa building “wala makabalda sa bisan unsang operasyon sa pantalan ug wala maglangkob sa materyal ug dakong paglapas.”
Kasamtangang nagpadayon ang konstruksyon sa Puso Village nga kabahin sa Joint Venture Agreement (JVA) tali sa City ug Megawide Construction Corporation alang sa redevelopment sa Carbon Public Market.
Gitumbok sa Siyudad nga ang writ nga gi-issue sa trial court batok sa pagtukod sa Puso Village ug uban pang kalambigit nga aktibidad sa maong lugar supak sa balaod nga nagdili sa trial court sa pag-isyu og bisan unsa nga temporary retraining orders ug writ of preliminary injunctions batok sa mga infrastructure project sa gobiyerno.
Si Rama, sa pakighinabi sa mga tigbalita niadtong Miyerkules, Abril 12, nipahimangno sa CPA nga dili mohagit sa awtoridad sa Siyudad, human masayri nga ang mga personnel sa City Hall, nga nanglimpyo sa mga agianan sa South Road Properties (SRP), gimandoan sa paghunong sa paglimpyo sa pantalan sa mga security personnel nga nagbantay sa lugar.