Grabe na ang kainit sa panahon karon, di ba? Kon niadtong miaging buwan miabot og 38 degrees Celsius ang kainiton, hayan karon naa na sa 40 degrees Celsius.
Sa mga edaran na, mas maayong magpa check up og doktor ug mo undergo og mga basic medical test aron mabantayan kon duna bay posibleng mga balatian nga wa mabantayi. Mas maayong masusi daan.
Sa mga pagtuon sab, nakita nga ang atoang muscles magsugod na og kupos sa edad nga 30. Mao nang nitambag ang medical experts nga mas maayo kon mag exercise, labina sa strength exercise. Di ingon nga magpadako sa muscles, but to maintain sa iyang mass.
Mao na ang tambag sa experts. Mao na nga angay nga bisan lang sa 30 minutos kada adlaw, mangita og higayon nga makapasingot, pinaagi sa cardio o strength exercise.
Makaayo sab ni nato nga bikers kay mas ready ang atoang lawas sa ride sa weekend, kon ikaw sama nako nga sa tapos lang sa semana makalugar tungod sa trabaho.
Sa ingon niana sab, di malab-anan ang exercise nga inay makaayo sa lawas, mas makadaut hinuon.
MAKADAUT
Yes, ang grabeng exercise makadaut sa lawas, matod sa mga eksperto. Ang igo-igo nga exercise, 30-40 minutos kada adlaw, maayo na kaayo sa lawas. Apan ang sobra niini, kada adlaw, labina kon intense na kaayo, makadaut na.
Inay nga makatabang sa stress ug makapakondisyon sa lawas, mas makapasamot na hinuon ni.
Moderate nga 30-40 minute exercise kada adlaw makaayo na sa lawas nga maoy girekomendar sa U.S. Department of Health and Human Services (HHS).
Nindot usab kon mag interval ang cardio ug strength exercise kay base sa akong experience, dunay maayong epekto sa lawas ug mas makapakondisyon. Balanse kaayo.
Niadtong nagsige pa ko og adto sa usa ka gym sa Talamban, diin dunay coach nga ni-guide nako, tanang muscle exercise iyang gitudlo sa akoa. Sa sugod, iya kong gigiyahan until nga ako nang nasag-ulo ang routine.
Unsay akong na-experience? Kay apil man ang lower body muscles, wa na ko nagsangkiig sa pagtindak sa bike patungas.
Wa na ko mabiyai og maayo sa akong anak nga babaye nga paspas nga motungas sa bukid.
KOMBINASYON
Didto na ko nakasabot kon nganong duna koy mga higala nga bisan panagsa ra mosikad, kondisyon gihapon kaayo sa mountain biking.
Ang ilang pag-adto diay sa gym dunay sagol nga exercise nga magamit kaayo sa biking. Mao usab ni ang akong nakit-an sa mga professional cyclist nga akong nakit-an sa mga channel diin sila gi-feature.
Usa sab, mas maayong di magpalabi og kaon sa mga pagkaon nga di maghatag sa lawas og kaayuhan, labina sa grabeng sugar ug fats.
Mas makaayo sa lawas kon minos ang carbohydrates, labina sa sugary nga mga pagkaon.
Kon gusto kang mogamay, sama sa gibuhat sa akong mga higala, likayi ang carbohydrates kay makuha man sa ubang mga pagkaon ang enerhiya gikan sa fats ug protina.
Kaniadto, wa ko nakagamay og maayo kay grabe man sab ko og kaon sa carbo, sugary foods. But sukad nagminos ko og maayo sa carbo, 20 pounds ang akong gius-us.