Mipadala og mabangis nga mensahe ang third-seeded Sacramento Kings sa ilang pagtumba sa defending champion Golden State Warriors sa opening game sa ilang best-of-seven Western Conference first round series sa National Basketball Association (NBA) kagahapon didto sa Sacramento, California, USA.
Gibansiwag sa Kings ang ilang pwersa sa kulbahinam nga duwa aron unhan ang sixth-seeded Warriors, 126-123, sa Game 1 sa ilang series.
Ang Sacramento guard nga si De’Aaron Fox maoy nangulo paglamba sa Warriors pinaagi sa iyang impresibo nga playoff debut bitbit ang 38 puntos nga maoy nakatabla sa rekord sa NBA nga second highest point sa playoff debut.
Matod ni Fox, nabuhat niya ang kulbahinam nga performance tungod pud sa gipakitang suporta ug pagdasig sa Sacramento fans nga mihuwat og 16 na tuig aron makita pagbalik ang Kings sa playoffs.
“Sacramento showed out tonight,” padayag ni Fox. “But doing this for the fans, just knowing the way that they support this team through thick and thin — really thin. It’s just a testament to the way they are.”
Nanginit ang mga kamot ni Fox sa second half diin siya mipabuhagay og 29 puntos lakip na niini ang 3-pointer sa uwahing bahin sa duwa nga maoy nakahatag og labaw sa Sacramento.
Ang player nga nakahimo og mas taas nga puntos ni Fox sa playoff debut mao si Luka Doncic nga mibuhat og 42 puntos alang sa Dallas Mavericks tulo ka tuig ang milabay.
“You need guys like that on your side because they know everything that we’re throwing at them,” matod ni Kings head coach Mike Brown. “There’s no secrets. You have to have guys on your team that can go make plays and Foxy went and made plays tonight.”
Ang Kings gaatubang og eksperinsiyado nga team sa Warriors, kinsa midaog og upat ka titulo sa uwahing walo ka season nga gipangulohan ni Stephen Curry, Klay Thompson ug Draymond Green.
Napakita sa Kings sa Game 1 nga kaya nila makigsabayan sa Warriors.
Kulbahinam ang hinapos nga bahin sa duwa. Nabiyaan nga abli si Andrew Wiggins sa corner apan nasipyat niya ang tres nga mao unta makahatag og labaw sa Warriors sa closing seconds sa duwa.
Na-foul si Malik Monk ug napasulod niini ang duha ka free throws aron inaton ang labaw sa Kings ngadto sa 126-123 nga adunay 2.9 segundos nalang sa duwa.
Nakaitsa pa unta si Curry og 3-pointer gikan sa timeout, apan sipyat gihapon kini dayong pagkapupos sa oras og ang Kings mitali sa ilang first playoff win sukad niadtong April 30, 2006 batok San Antonio.
Si Monk mipabuto og 32 puntos gikan sa bench samtang si Domantas Sabonis midunol og 12 puntos ug 16 rebounds alang sa Kings.
Ang Warriors gipangulohan ni Curry sa iyang 30 puntos, miamot og 21 puntos si Thompson ug 18 puntos matag-usa si Wiggins ug Jordan Poole.
Ang Game 2 gitakda karong Martes didto gihapon sa Golden 1 Center, Sacramento, California. (RSC)