Moabot na sa 1,531 ka mga barangay sa Central Visayas (CV) ang gideklarar nga drug-cleared human nga laing 87 ka barangay ang napuno base sa gihimong evaluation sa Philippine Drug Enforcement Agency (PDEA) 7 uban sa Department of Health (DOH)7, Department of the Interior and Local Government (DILG) ug ang Philippine National Police (PNP).
Ang Central Visayas adunay kinatibuk-ang 3,003 ka mga barangay samtang 1,531 na ka barangay ang drug-cleared.
Samtang adunay 116 ka barangay ang ‘drug-free’ hinungdan nga anaa sa 43 porsyento ang drug affectation nga gitinguha nga mapaubsan pa.
Sa miaging semana, gipaubos sa deliberation sa Regional Oversight Committee on Barangay Drug Clearing Program ang 87 ka mga barangay sa tibuok rehiyon ug nasuta nga mipasar sa gipangayo nga rekisitos.
Ang probinsya sa Sugbo maoy adunay labing daghang gideklarar nga barangay drug- cleared nga moabot sa 41, gisundan sa Negros Oriental nga 22, samtang 16 sa Bohol ug dugang walo sa dakbayan sa Sugbo.
Ang walo ka mga barangay sa dakbayan sa Sugbo ang nadeklarar nga drug-cleared mao ang Barangay Budlaan, Kamagayan, Punta Princesa, Binaliw, Agsungot, Tabunan, Adlaon, ug Kalubihan. Samtang ang tibuok lungsod sa Basay, Negros Oriental ang labing unang lungsod sa maong lalawigan nga gideklarar nga drug-cleared municipality ug nahimutang ikapito sa tibuok rehiyon.
Sa gihimong panagtagbo niadtong Abril 13-14, 2023, diin mitambong ang mga mayor ug mga miyembro sa Anti-Drug Abuse Council (ADAC) ug mibutyag sa ilang nga nasinating hagit ug paningkamot nga madeklarar nga drug-cleared ang ilang mga barangay tungod sa ka higpit sa mga rekisitos niini.
Si Director III Jigger Montallana, pangulo sa PDEA 7, mipasabot nga ang pagdeklarar sa 87 ka mga barangay nga drug- cleared wala magpasabot nga mohunong na sila sa paglusad og anti-illegal drug operation sa maong mga barangay.
Sub-sub gihapon nga monitoring ang ilang buhaton uban sa kapulisan ug kon dunay mga drug personality nga naa sa ilang listahan ila kining panakpon.
KAMAGAYAN
Si Leia Albiar-Alcantara, information officer sa PDEA 7, nipasabot nganong naapil ang Barangay Kamagayan nga nahimong drug-cleared tungod kay nakakuha sila sa requirement sa Barangay Drug Clearing Program (BDCP).
Usa sa mga rekisitos mao ang pag-account sa tanang drug personalities nga naa sa PDEA-PNP Certified BADAC Watch List nga gitawag og CBWL.
Kinahanglan nga aktibo nga naglihok ang Barangay Anti-Drug Abuse Council (BADAC).
Ang naa sa maong listahan validated matod pa kini sa ilang intelligence unit sa ilang ahensya ug sa PNP. Sila usab ang mo-report sa PDEA ug PNP labot sa drug personalities sa ilang barangay ug aduna silay mga programa sama sa drug abuse prevention program.
Usa sa labing mahinungdanon napaubos sa community-based drug rehab program ang drug personalies ug nagnegatibo sa kinalit nga drug test nga gihimo sa PDEA ug DOH.