Barrita: Kuyaw ang sunog sa tag-as nga building

Barrita: Kuyaw ang sunog sa tag-as nga building

Nasunog ang usa ka dakong tindahan. Miabot ang daghang trak sa mga bombero. Gipasiritan dayon nila og tubig sa ilang mga hose. Apan kalit miabot ang laing trak sa bombero nga nilahos sa taliwa sa nasunog nga tindahan. Taud-taod, napawong ang kayo ug migawas ang usa ka bombero.

Gipasidunggan siya sa mga negosyante sa maong lugar tungod sa iyang kaisog sa pagsungasong sa sunog. Gipremyohan siya og cash nga P50,000. Tubag sa bombero sa dihang gipangutana siya kon unsaon niya ang premyo, “Akong ipaayo ang brake sa among fire truck.”

Sakto gyud si Cebu City Mayor Mike Rama sa paghiling sa kahimtang sa kagamitan ug kahimanan sa Cebu City Fire Office (CCFO) human sa siyam ka oras nga sunog sa usa ka 37 ka andana nga condominium building sa Barangay Kasambagan ning siyudad niadtong Biyernes, Abril 14.

* * *

Morag uhong nga nanurok ang tag-as nga mga building sa siyudad sa Sugbo ug sa silingang mga dakbayan. Apan sumala pa sa mga opisyales sa atong kabomberohan, ang labing taas nga fire ladder kutob lang sa ika-18 nga andana.

Ang labing taas nga building sa siyudad miabot og 51 ka andana. Klarong di na gyud maabot sa mga fire ladder. Kon simbako masunog, kinahanglan na nga katkaton sa mga bombero, ilabi na kon dunay nagpuyo sa maong building nga kinahanglang luwason.

Hinuon, duna may fire extinguishers ug sprinklers ang mga bag-ong building. Ang nasunog nga building sa Grand Residences condominium dunay sprinklers apan di pa magamit kay wa pa man mahuman.

* * *

Maayo gani kay wa pa mahuman. Busa wa pay nagpuyo sa maong building. Matod ni CCFO Senior Fire Officer Wendell Villanueva, didto sa kinatas-ang andana nagsugod ang sunog. Apan dali kining nanaog sa ubos nga mga andana.

Naglisod ang mga bombero kay wa sila magdahom nga daling manaog ang kayo. Aron paglikay sa risgo nga mababoy sa kayo sa taliwa sa nasunog nga mga andana, gipkanaog na lang ang mga bombero nga nisaka sa taas sa building.

Angay ug matarong gayud nga hatagan sila sa kompleto ug modernong mga equipment nga sarang magamit ilabi na sa mga tag-as nga building. Gikinahanglan sab ang saktong ekipo sa pagluwas sa mga tawo nga nagpuyo sa masunog nga skyscraper.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph