BOLUNTARYONG mitahan sa iyang kaugalingon ang 26-anyos nga sakop sa Citizen Armed Forces Geographical Unit (Cafgu) ngadto sa buhatan sa kapulisan sa lungsod sa Monkayo niadtong Abril 15, 2023.
Sumala pa nga ang pagsurender ni Kim Esperanza nga taga Brgy. Maparat , Compostela giubanan sa iyang abogado nga si Atty. Glen Carnicer kinsa maoy nag-awhag niini nga pa-surenderon.
Gawas sa abogado, nikuyog sab ang inahan nga si Rena Esperanza kinsa namahayag nga wala’y sala ang anak sanglit gipasanginlan lamang kini ug dili tinuod nga mipatay sa duha ka mga biktima sa managlaing lungsod ning probinsiya.
Gisulti ni Carnicer nga ang iyang kliyente dunay duha ka warrant sa kasong murder. Usa niini ang giingong pasangil sa pagpatay sa pulis sa lungsod sa Nabunturan nga ang warrant migawas Septyembre 2021 ug ikaduha ang pasangil sa pagpatay sab sa usa ka Janice Satur niadtong 2019 sa lungsod sa Monkayo nga ang warrant migawas Agosto 2021.
Gipangatarungan sa Cafgu nga wala niya kini mahimo ug pulos lang mga pasangil.
Gibutyag nga giawhag ni Carnicer ang iyang kliyente nga motahan sanglit, mo-file sila og petisyon aron nga makapiyansa kun "Petition for Bail".
Dako ang pagtuo ni Carnicer nga modaug sila sa kaso sanglit sa duha ka warrant wala magkatugma ang address sa suspek hinungdan nga ulahi nang nasayran sa suspek nga duna siya’y mga warrant of arrest.
Anaa karon sa kustodiya sa Monkayo Municipal Police Station ang suspek ug malaumon nga makab-ot ang hustisya ug malimpyo ang iyang ngalan sa salaod nga wala niya gihimo.