Giusban pagbuntog sa host Sacramento Kings ang defending champion Golden State Warriors, 114-106, sa Game 2 aron pagposte og 2-0 nga bintaha sa ilang Western Conference 1st round playoffs series sa National Basketball Association (NBA) ning Martes, Abril 18, 2023 (PH time).
Ang Kings, nga karon pa nakabalik pagsulod sa playoffs gikan niadtong 2006, mao ang labing unang nakaposte og 2-0 nga bintaha batok sa puwersa sa Warriors nga ubos sa pagpangulo ni Stephen Curry.
Sa nahabiling 7:03 minutos, na-ejected ang pambato sa Warriors nga si Draymond Green human niya giyatakan ang tiyan sa natumbang big man sa Kings nga si Domantas Sabonis. Niadtong higayuna, naglabaw ang Kings, 91-87.
Ang maong panghitabo tataw nga nakahatag og dugang determinasyon sa Kings nga paludhon og balik ang Warriors.
“I think that brought us together,” matod sa usa sa mga pambato sa Kings nga si De’Aaron Fox.
“We huddled up and were like, ‘We have to win this game.’ Everybody thought he’d be ejected. When that happens, usually that team comes together and goes on a run. But we were able to negate that.”
Sa nahabiling 1:12 minutos, nainat sa Kings ang ilang labaw ngadto sa 112-103 ug ninglahos na sila paingon sa dalaygong kadaugan.
Ang Kings gipangulohan nila ni Fox ug Sabonis pinaagi sa ilang 24 puntos matag usa samtang niamot og 18 puntos si Malik Monk.
76ERS, 2-0 SAB
Sa laing duwa, nakaposte sab og 2-0 nga bintaha ang host Philadelphia 76ers human nila giusban pagmakmak ang Brooklyn Nets, 96-84.
Kuyaw nga nakaduwa si Tyrese Maxey ug gipangulohan niya ang 76ers pinaagi sa iyang 33 puntos nga gibuwakan og unom ka three-point shots.
Si All-Star center Joel Embiid ug Tobias Harris ningdugang og 20 puntos matag usa alang sa 76ers.
“A lot of people think I just love scoring the basketball,” matod ni Embiid. “I don’t think it’s true. I enjoy winning.”
Ang Nets gipangulohan ni Cameron Johnson pinaagi sa iyang 28 puntos, nidugang og 21 puntos si Mikal Bridges samtang nitampo og 12 puntos si Spencer Dinwiddie.
Kanunay nga naggukod ang 76ers sa 1st half apan pagsugod sa 3rd quarter, ilang gipamatud-an og sugod nga mas nakabintaha ang ilang puwersa kumpara sa Nets. (AP)